मुंबई : अर्थ मंत्रालयाने जाहीर केलेल्या आकडेवारीनुसार, मार्चमध्ये 1.78 लाख कोटी रुपयांचा जीएसटी जमा झाला. हे आतापर्यंतचे दुसरे सर्वोच्च जीएसटी संकलन आहे. मार्चमधील जीएसटी संकलन वार्षिक आधारावर 11.5 टक्के अधिक आहे. संपूर्ण आर्थिक वर्ष 2023-24 मध्ये केंद्र सरकारला जीएसटीतून 20.14 लाख कोटी रुपयांचा महसूल मिळाला आहे. हा आकडा 2023 च्या आर्थिक वर्षाच्या संकलनापेक्षा 11.7 टक्के जास्त होते. वित्त मंत्रालयाने जारी केलेल्या निवेदनानुसार, आर्थिक वर्ष 2024 मध्ये जीएसटी संकलनात ही वाढ देशांतर्गत व्यवहारांमध्ये 17.6 टक्क्यांनी वाढ झाल्यामुळे झाली आहे. गेल्या आर्थिक वर्षात दरमहा सरासरी संकलन 1.68 लाख कोटी रुपये होते. तर 2023 च्या आर्थिक वर्षात हा आकडा 1.5 लाख कोटी रुपये होता. राज्यांचा वाटा किती ? मार्च 2024 मध्ये 1.78 लाख कोटी रुपयांचा जीएसटी जमा झाला. जीएसटी संकलनाचे केंद्रीय वस्तू आणि सेवा कर (CGST), राज्य वस्तू आणि सेवा कर (SGST) आणि एकात्मिक वस्तू आणि सेवा कर (IGST) हे तीन मुख्य भाग आहेत. मार्चमध्ये सीजीएसटीचा हिस्सा 34532 कोटी रुपये, एसजीएसटीचा हिस्सा 43,746 कोटी रुपये आणि आयजीएसटीचा हिस्सा 87,947 कोटी रुपये होता. आयजीएसटीमध्ये आयात केलेल्या वस्तूंवर 40,322 कोटी रुपये जमा झाले, तर सेस 12,259 कोटी रुपये होता. त्यापैकी 996 कोटी रुपये सेस आयात केलेल्या मालावर गोळा केला गेला.
