मुंबई: कॉमेडियन कुणाल कामरा याच्या अडचणींना आता नवं वळण मिळालं आहे. उपमुख्यमंत्री एकनाथ शिंदे यांच्यावर टीकात्मक गाणं तयार करून त्याचा व्हिडीओ सोशल मीडियावर शेअर केल्याने कुणाल कामरा पुन्हा एकदा वादाच्या भोवऱ्यात सापडला आहे. या गाण्याचा व्हिडीओ खासदार संजय राऊत यांनी ट्विट केल्यानंतर शिंदे गटाच्या शिवसेनेने आक्रमक पवित्रा घेतला.

शिवसेना नेत्यांनी कुणालविरोधात पोलिसांत तक्रार दाखल केली, ज्यानंतर त्याच्यावर गुन्हा नोंदवण्यात आला. इतकंच नाही, तर शिवसैनिकांनी कुणालचा कार्यक्रम झालेल्या हॉटेलमध्ये घुसून सभागृहाची तोडफोड केली. आता या प्रकरणात कुणालविरुद्ध मोठी कारवाई होण्याची शक्यता असून, गृहराज्यमंत्री योगेश कदम यांनी विधान परिषदेत याबाबत माहिती दिली.

काय आहे प्रकरण?

कुणाल कामराने आपल्या कार्यक्रमात एकनाथ शिंदे यांच्यावर टीका करणारं गाणं सादर केलं आणि तो व्हिडीओ सोशल मीडियावर पोस्ट केला. यामुळे शिवसैनिक आणि नेत्यांच्या भावना दुखावल्या गेल्या. आता या गाण्यामागील हेतू आणि प्रेरणा शोधण्यासाठी तपास सुरू होणार आहे. कुणालला कोणी राजकीय सूत्रधाराने प्रवृत्त केलं का? त्याला यासाठी पैसे मिळाले का? याचा शोध घेण्यासाठी त्याची बँक खाती, मोबाईलचे सीडीआर (कॉल डेटा रेकॉर्ड) आणि कॉल रेकॉर्डिंग तपासली जाणार आहेत. गृहराज्यमंत्र्यांनी याबाबत विधान परिषदेत स्पष्ट भूमिका मांडली आहे.

योगेश कदम यांचं विधान परिषदेतील वक्तव्य –

“सभापती महोदय, या प्रकरणाचा घटनाक्रम नीट समजून घ्यायला हवा. एक व्यक्ती ट्विट करते आणि त्याची बातमी बाहेर पडण्यापूर्वीच सभागृहातील काही सदस्यांनी ते ट्विट रिट्विट केलं. त्यांना हे कसं कळलं? या सगळ्याचं गांभीर्य लक्षात घेऊन कुणाल कामराचे सर्व सीडीआर तपासले जातील. त्याचे कॉल रेकॉर्ड तपासले जाणार आहेत. त्याच्या बँक खात्यात कुठून पैसे आले, याचीही चौकशी होईल. यामागे खरा सूत्रधार कोण आहे, हे शोधून त्याच्यावरही कठोर कारवाई केली जाईल,” असं योगेश कदम म्हणाले.

ते पुढे म्हणाले, “अशी कॉमेडी आम्ही सहन करणार नाही. सभागृहात व्यक्त झालेल्या शंकांचा बोलवता धनी कोण आहे, हे शोधण्यासाठी कुणालचे सीडीआर, कॉल रेकॉर्डिंग आणि बँक खात्यांची तपासणी होईल. यामागील सर्व सत्य समोर आणलं जाईल.”

कुणालच्या अडचणी वाढणार?

या प्रकरणामुळे कुणाल कामराच्या कायदेशीर अडचणी वाढण्याची शक्यता आहे. शिंदे गटाच्या शिवसेनेने आक्रमक भूमिका घेतल्याने आणि तपासाची व्याप्ती वाढवण्यात आल्याने हे प्रकरण आता आणखी गंभीर बनलं आहे. कुणालच्या गाण्यामागे राजकीय षडयंत्र आहे का, हे तपासातून स्पष्ट होईल, पण तोपर्यंत त्याच्यावरील दबाव वाढतच जाणार आहे. यामुळे हे प्रकरण आगामी काळात आणखी चर्चेत राहण्याची शक्यता आहे.