Newasa News : नेवासे शहरात आणि परिसरात (Newasa News) सध्या मोकाट कुत्र्यांच्या उच्छादाने कळस गाठला असून, नागरिकांचे रस्त्यावर चालणेही मुश्कील झाले आहे. लहान मुले, शाळेत जाणारे विद्यार्थी तसेच वयोवृद्ध नागरिकांवर या भटक्या कुत्र्यांचे जीवघेणे हल्ले वारंवार होत आहेत. परिस्थिती इतकी गंभीर बनली असतानाही नगरपंचायत प्रशासन मात्र कुंभकर्णी झोपेत असल्याचा संताप व्यक्त होत आहे.

प्रशासनाच्या या बेफिकीर वृत्तीविरोधात आता नेवाशात जनक्षोभाचा भडका उडाला असून, सामाजिक कार्यकर्ते शिवा राजगिरे यांनी थेट नगरपंचायत चौकात बुधवारपासून बेमुदत उपोषणाचे हत्यार उपसले आहे. प्रशासनाने भटक्या कुत्र्यांचा तात्काळ बंदोबस्त करावा, या एकाच मागणीवर ते ठाम आहेत.

या आंदोलनात (Newasa News) एका अनोख्या निषेध आंदोलनाने अवघ्या नेवासे शहराचे लक्ष वेधून घेतले. आंदोलनाला जाहीर पाठिंबा देण्यासाठी शांताराम गायके यांनी चक्क दोन्ही पायांना क्रिकेटचे बॅटिंग पॅड बांधून आणि पोटावर “नेवासे शहरात कुत्र्यांचा सुळसुळाट, मोकाट कुत्र्यांचा बंदोबस्त झाला पाहिजे” असा फलक लावून नगरपंचायत चौकात हजेरी लावली. कुत्र्यांच्या चाव्यापासून संरक्षणासाठी वापरलेली ही अभिनव शक्कल सध्या शहरभर आणि समाजमाध्यमांवर तुफान चर्चेचा विषय ठरली आहे.

दरम्यान, या आंदोलनाला विविध स्तरांतून प्रचंड पाठिंबा मिळत असून नगरपंचायत प्रशासनाविरोधात संताप अधिक तीव्र झाला आहे. प्रशासनाने परिस्थितीचे गांभीर्य ओळखून तात्काळ लेखी आश्वासन द्यावे आणि उपोषण (Newasa News) सोडवावे, अन्यथा तब्बल अकरा नगरसेवकांना सोबत घेऊन व्यापक जनआंदोलन उभारू तसेच नगरपंचायतीवर धडक मोर्चा काढू, असा थेट इशारा विधिज्ञ संजय सुखदान यांनी दिला आहे.

या आंदोलनास उपनगराध्यक्ष शालिनीताई सुखदान, नगरसेवक राजू काळे यांच्यासह शांताराम गायके व शेकडो संतप्त नागरिकांनी प्रत्यक्ष उपस्थित राहून आपला सक्रिय पाठिंबा दर्शविला आहे.