नेवासा : नेवासा तालुक्यातील वडुले येथील शेतकरी बाबासाहेब सरोदे यांच्या आत्महत्येच्या निषेधार्थ वंचित बहुजन आघाडीच्या नेतृत्वाखाली रविवार, २४ ऑगस्ट २०२५ रोजी सकाळी ११:१५ वाजता कुकाणा येथील बसस्थानक चौकात सर्वपक्षीय रास्तारोको आंदोलन करण्यात आले. या आंदोलनात वंचित बहुजन आघाडीचे प्रदेश महासचिव व प्रवक्ते प्रा. किसन चव्हाण यांनी महाराष्ट्रातील फडणवीस सरकारवर गंभीर आरोप केले. त्यांनी बाबासाहेब सरोदे यांची आत्महत्या ही आत्महत्या नसून फडणवीस सरकारने केलेला खून असल्याचा दावा करत सरकारवर सदोष मनुष्यवधाचा गुन्हा दाखल करण्याची मागणी केली.

आंदोलन आणि सरकारविरोधी संताप
प्रा.किसन चव्हाण यांनी आंदोलनादरम्यान सांगितले की, “फडणवीस सरकारचा निषेध व्यक्त करण्यासाठी आणि शेतकऱ्यांवरील अन्यायाविरोधात धिक्कार व्यक्त करण्यासाठी आम्ही एकत्र आलो आहोत. आम्ही सर्व शेतकऱ्यांची मुले आहोत आणि बाबासाहेब सरोदे यांच्या कुटुंबावर ओढवलेल्या प्रसंगाविरोधात रस्त्यावर उतरलो आहोत.” त्यांनी सरकारवर शेतकरी, बहुजन, अल्पसंख्याक आणि आदिवासीविरोधी धोरणे राबवल्याचा आरोप केला. चव्हाण यांनी पुढे म्हटले की, “निवडणुकीत देवेंद्र फडणवीस, अजित पवार आणि एकनाथ शिंदे यांनी शेतकऱ्यांचा सातबारा कोरा करू आणि कर्जमुक्ती देऊ असे आश्वासन दिले होते. मात्र, हे आश्वासन फसवे ठरले आहे. सरकारला जाब विचारण्यासाठी आंदोलन केल्यास अर्बन नक्षलवादाचा ठपका ठेवून तुरुंगात टाकले जाते.”

शेतकरी आत्महत्यांचे वाढते प्रमाण
चव्हाण यांनी सांगितले की, फडणवीस सरकारच्या काळात महाराष्ट्रात शेतकरी आत्महत्यांचे प्रमाण सर्वाधिक आहे. आत्महत्याग्रस्त शेतकऱ्यांच्या मदतीसाठीच्या फायली जिल्हाधिकारी कार्यालयात त्रुटी काढून पडून आहेत. त्यांनी वडुले गावकऱ्यांना आवाहन केले की, जोपर्यंत संपूर्ण कर्जमाफी मिळत नाही, तोपर्यंत आंदोलन सुरू ठेवावे.

इतर नेते काय म्हणाले?
ॲड. देसाई देशमुख म्हणाले “बाबासाहेब सरोदे यांच्या आत्महत्येमुळे सरकारला या प्रश्नावर गंभीरपणे विचार करावा लागेल. या रास्तारोको आंदोलनाची सरकार निश्चितच दखल घेईल, अशी आशा आहे.”
काँग्रेस नेते संभाजी माळवदे म्हणाले “सध्याचे राजकारण खालच्या पातळीवर गेले आहे. आरोप-प्रत्यारोपांमध्ये सर्वसामान्य शेतकरी आणि गरीब माणूस पिळवटला जात आहे. रोज शेतकरी आत्महत्या होत असताना राजकीय नेत्यांमध्ये संवेदनशीलता उरलेली नाही. महायुती सरकारने दोन महिन्यांत सातबारा कोरा करण्याचे आणि कर्जमाफीचे आश्वासन दिले होते, ते पूर्ण करावे. अन्यथा, फसवणुकीचा गुन्हा दाखल व्हायला हवा.”
शेतकरी संघटनेचे नेते त्रिंबक भदगले म्हणाले “शेतकरी आत्महत्या हे सरकारचे अपयश आहे. शेतकऱ्यांनी आत्महत्या करण्यापेक्षा, ज्यांच्यामुळे ही वेळ आली, त्यांच्यावर कारवाई करावी. सातबारा कोरा होईपर्यंत सरकारने शेतकऱ्यांच्या मतांवर अवलंबून राहू नये.”

आंदोलनात सहभागी नेते आणि कार्यकर्ते
आंदोलनात वंचित बहुजन आघाडीचे नेते अनिल जाधव, नेवासा तालुका अध्यक्ष पोपटराव सरोदे, लहुजी सेनेचे भैरवनाथ भारस्कर, शेतकरी संघटनेचे अशोक काळे, बाबासाहेब खराडे, संजय वाल्हेकर, संदीप चाबुकस्वार, विजय गायकवाड, शंकर भारस्कर, अशोक गर्जे, मच्छिंद्र कार्ले, बाबासाहेब आल्हाट, नितीन गोरडे, विनोद गोरडे, जोसेपाल्लाट, दीपक सरोदे, आकाश इंगळे, संदीप शिरसाट यांच्यासह विविध पक्षांचे कार्यकर्ते सहभागी झाले. त्यांनी सरकारच्या शेतकरीविरोधी धोरणांचा तीव्र निषेध व्यक्त केला.

रास्तारोको आणि प्रशासनाची भूमिका
सुमारे ४५ मिनिटे चाललेल्या या रास्तारोकोमुळे रस्त्याच्या दोन्ही बाजूंना वाहनांच्या लांबच लांब रांगा लागल्या. कुकाणा मंडलाधिकारी तृप्ती साळवे आणि पोलीस निरीक्षक महेश पाटील यांनी आंदोलकांचे निवेदन स्वीकारले. पोलीस निरीक्षक महेश जाधव यांच्या नेतृत्वाखाली उपनिरीक्षक मनोज अहिरे, पो.कॉ. शहाजी आंधळे, बाबासाहेब वाघमोडे, वाल्मिक वाघ, संदीप ढाकणे, गणेश फाटक यांनी चोख बंदोबस्त ठेवून वाहतूक सुरळीत केली.

निवेदनातील प्रमुख मागण्या
1. बाबासाहेब सरोदे यांच्या कुटुंबाला ५० लाख रुपयांची आर्थिक मदत द्यावी.
2. महाराष्ट्र सरकारवर सदोष मनुष्यवधाचा गुन्हा दाखल करावा.
3. निवडणुकीत दिलेले कर्जमाफीचे आश्वासन तात्काळ पूर्ण करावे.
4. आत्महत्याग्रस्त शेतकऱ्यांच्या मुलांचे शैक्षणिक पालकत्व सरकारने स्वीकारावे.
5. जिल्ह्याचे पालकमंत्री, खासदार आणि आमदार यांनी आत्महत्याग्रस्त शेतकरी कुटुंबाला दशक्रियाविधीपूर्वी जिल्हा नियोजन समितीच्या निधीतून आर्थिक मदत करावी.