Newasa News : “जिल्हा बँकेची निवडणूक बिनविरोध करण्यासाठी जिल्ह्यातील (Newasa News) सर्व साखर सम्राट एकत्र येऊन हातात हात घालू शकतात, मग घाम गाळणाऱ्या शेतकऱ्यांच्या उसाला योग्य भाव देण्यासाठी त्यांना एकत्र का येता येत नाही?” असा संतप्त सवाल विचारत शेतकरी संघटनेच्या वतीने मंगळवारी अहिल्यानगर-छत्रपती संभाजीनगर महामार्गावर नेवासे फाटा येथील राजमुद्रा चौकात तीव्र रस्ता रोको आंदोलन करण्यात आले. आंदोलकांनी तब्बल दोन तास महामार्ग रोखून धरत चक्का जाम केला.

या आंदोलनादरम्यान कार्यकर्त्यांनी भररस्त्यात ठिय्या मांडून भजन करत साखर सम्राटांचा जाहीर निषेध नोंदवला. आशिया खंडातील पहिला सहकारी साखर कारखाना ठरलेल्या प्रवरानगर कारखान्यानेच आता पुढाकार घेऊन उसाचा पहिला भाव जाहीर करावा, अशी मागणी करण्यात आली. तसेच जिल्ह्याचे पालकमंत्री डॉ. राधाकृष्ण विखे पाटील यांनी उसाला प्रतिटन किमान साडेचार हजार रुपये दर द्यावा, असा आक्रमक पवित्रा आंदोलकांनी (Newasa News) घेतला.

सत्तेत असूनही आमदार शेतकऱ्यांसोबत थेट रस्त्यावर
या आंदोलनाचे प्रमुख आकर्षण ठरले ते आमदार विठ्ठलराव लंघे-पाटील यांची प्रत्यक्ष उपस्थिती. सत्तेत सहभागी असूनही ते शेतकऱ्यांच्या रास्त मागण्यांसाठी थेट आंदोलनात उतरले आणि रखरखत्या उन्हात रस्त्यावर मांडी घालून बसले.

यावेळी भूमिका मांडताना आमदार लंघे-पाटील म्हणाले, “मी केवळ एका तालुक्याचा आमदार म्हणून नव्हे, तर एक शेतकरी पुत्र म्हणून आज तुमच्या सोबत बसलो आहे. ऊस पिकवणे शेतकऱ्यांच्या हातात असले तरी त्याला योग्य भाव मिळवणे बळीराजाच्या हातात उरलेले नाही. शेतकरी सध्या भीषण दुष्काळाला तोंड देत असताना उसाला योग्य दर मिळणे अत्यावश्यक आहे. शेतकऱ्यांचे कोट्यवधी रुपये वर्षानुवर्षे कारखानदारांकडे अडकून पडले आहेत; ही थकीत रक्कम व्याजासह तातडीने परत करावी, हीच माझी प्रमुख मागणी आहे.” आमदार लंघे-पाटील यांनी आंदोलनाला जाहीर पाठिंबा देताच उपस्थितांनी त्यांचे जोरदार स्वागत केले.

‘जिल्हा बँक ही कामधेनू, पण शेतकऱ्यांच्या भावाचे काय?’; साखर सम्राटांवर चौफेर टीका
आंदोलनात सहभागी विविध नेत्यांनी साखर कारखानदारांच्या धोरणांवर कडाडून टीका केली. कारखानदारांवर शेकडो कोटींचे कर्ज असल्याने त्यांनी स्वतःच्या फायद्यासाठी जिल्हा बँकेची निवडणूक बिनविरोध केली; मात्र रात्रंदिवस कष्ट करणाऱ्या शेतकऱ्यांच्या उसाचा भाव जाहीर करताना हेच कारखानदार मूग गिळून गप्प बसतात, असा आरोप वक्त्यांनी केला.

ऊस तोडणी झाल्यानंतर १५ दिवसांच्या आत शेतकऱ्यांच्या बँक खात्यात थेट पैसे जमा करणे कायद्याने बंधनकारक असतानाही त्याचे सर्रास उल्लंघन होत असल्याकडे लक्ष वेधण्यात आले. तसेच सर्व कारखान्यांच्या वजन काट्यांची अधिकृत व निष्पक्ष तपासणी करण्यात यावी, अशी मागणीही यावेळी लावून धरण्यात आली.

या आंदोलनात शेतकरी संघटनेचे राज्य उपाध्यक्ष ॲड. अजित काळे, अंकुशराव काळे, भाजपाचे जिल्हा उपाध्यक्ष सचिन देसरडा, ऋषिकेश शेटे, नगरसेवक महेश लोखंडे, कृष्णा परदेशी, प्रवीण सरोदे, अंकुश म्हस्के, शिवसेनेचे भाऊसाहेब वाघ, बाळासाहेब पवार, आम आदमी पक्षाचे जिल्हाध्यक्ष राजू आघाव, किरण जाधव, माजी जि.प. सदस्य पुरुषोत्तम सर्जे, माऊली पेचे, मनोज पारखे, विनोद ढोकणे, ॲड. विश्वास काळे, राजू मते, संभाजी माळवदे, बाळासाहेब क्षीरसागर, मेजर अशोक काळे, संतोष काळे यांच्यासह गणेश झगरे, नितिन जगताप, प्रताप चिंधे, नामदेव येळवंडे, संदिप खरड, बाळासाहेब चिंधे, कृष्णा नवले, विजय गायकवाड, गणेश चौगुले, आदिनाथ पटारे, सतीश कर्डीले, मधुकर पावसे, भाऊसाहेब काळे व शेकडो शेतकरी सहभागी झाले होते.

सुमारे दोन तास चाललेल्या या चक्का जाममुळे महामार्गाच्या दुतर्फा सुमारे दोन किलोमीटरपर्यंत वाहनांच्या लांबच लांब रांगा लागल्या होत्या. नेवासा पोलीस ठाण्याचे निरीक्षक प्रताप दराडे व सहाय्यक पोलीस निरीक्षक अमोल पवार यांच्या मार्गदर्शनाखाली सहाय्यक फौजदार गणेश नागरगोजे व पोलीस पथकाने चोख बंदोबस्त ठेवून वाहतूक (Newasa News) सुरळीत केली.