Newasa News : महाशिवरात्रीच्या निमित्ताने नेवासा तालुक्यातील (Newasa News) हंडीनिमगाव आणि सुरेशनगर यांच्या मध्यभागी वसलेल्या स्वयंभू श्री त्रिवेणीश्वर महादेव संस्थान येथे भक्तिमय वातावरणात उत्सव साजरा झाला. महंत स्वामी रमेशानंदगिरी महाराज यांच्या मार्गदर्शनाखाली हा उत्सव आयोजित करण्यात आला होता. या उत्सवात दिवसभरात सुमारे दोन लाख भाविकांनी त्रिवेणीश्वर महादेवाचे दर्शन घेतले. यावेळी “हर हर महादेव”च्या जयघोषाने संपूर्ण परिसर दुमदुमला. पंचदिनात्मक कार्यक्रम आणि रुद्राभिषेक ब्रह्मलीन भक्त प्रल्हाद महाराज यांच्या कृपा आशीर्वादाने आणि देवगडचे महंत भास्करगिरीजी महाराज यांच्या प्रेरणेने महंत रमेशानंदगिरीजी महाराज यांच्या नेतृत्वाखाली पंचदिनात्मक महाशिवरात्री उत्सवाचे आयोजन करण्यात आले होते. महाशिवरात्रीच्या पहाटे वेदमंत्रांच्या जयघोषात महंत स्वामी रमेशानंदगिरीजी महाराज यांच्या हस्ते रुद्राभिषेक आणि दुग्धाभिषेक करण्यात आला. यावेळी दर्शनासाठी आलेल्या मान्यवर, भक्त परिवारातील सदस्यांचा महंतजींच्या हस्ते सन्मान करण्यात आला. त्रिवेणीश्वर भक्त मंडळ आणि स्थानिक तरुण मंडळांच्या सदस्यांनी तन-मन-धनाने सेवा बजावली. भाविकांना शिस्तबद्ध दर्शनासाठी मंदिर सभामंडपात दर्शन बारी तयार करण्यात आली होती. दर्शन नियोजन, प्रसाद वाटप आणि इतर व्यवस्थेसाठी हंडीनिमगाव व सुरेशनगर येथील युवकांनी स्वयंसेवक म्हणून उत्साहाने काम केले. विविध धार्मिक आणि सांस्कृतिक कार्यक्रम महाशिवरात्री निमित्त मंदिर प्रांगणात ब्रह्मलीन भक्त प्रल्हाद महाराजांचे समाधी मंदिर, हनुमान मंदिर आणि अन्नपूर्णा माता मंदिर येथेही भाविकांनी दर्शन घेतले. सर्व भाविकांना शाबुदाणा खिचडीचे प्रसाद म्हणून वाटप करण्यात आले. सांस्कृतिक कार्यक्रमांतर्गत सकाळी ९ ते १२ वाजेपर्यंत शिवशाहीर नानासाहेब कोलते सर व सहकाऱ्यांचा पोवाडा सादर झाला. दुपारी १२ ते २ वाजेपर्यंत जिल्हा परिषद शाळा व विद्यालयांच्या विद्यार्थ्यांनी विविध सांस्कृतिक कार्यक्रम सादर केले. दुपारी ३ ते ५ वाजेपर्यंत सद्गुरू नारायणगिरी महाराज आश्रमाचे प्रसिद्ध कीर्तनकार उद्धवजी महाराज मंडलिक यांचे शिव महिमा यावर हरिकीर्तन झाले, ज्याला भाविकांचा उत्स्फूर्त प्रतिसाद मिळाला. यात्रा, रोषणाई आणि पालखी मिरवणूक अहिल्यानगर-संभाजीनगर हायवेवरील मुख्य कमानीपासून मंदिर प्रांगणापर्यंत मोठी यात्रा भरली होती. खेळणी, सौंदर्यप्रसाधने, गृहोपयोगी वस्तू, रसवंती गृहे, शीतपेय दुकाने यांचे स्टॉल थाटण्यात आले होते. मुख्य प्रवेशद्वारावर विद्युत रोषणाई आणि गणेश मूर्तीजवळील कारंजा आरास देखावा सर्वांचे लक्ष वेधून घेत होता. सायंकाळी पालखी मिरवणूक निघाली, ज्याला तोफांची सलामी आणि उत्स्फूर्त स्वागत मिळाले. भाविकांच्या गर्दीने आणि भगवान शंकराच्या नामस्मरणाने वातावरण पूर्णपणे शिवमय झाले होते. दिवसभर शाबुदाणा खिचडीचे प्रसाद वाटप सुरू होते. मान्यवरांची उपस्थिती खासदार भाऊसाहेब वाकचौरे, माजी मंत्री शंकरराव गडाख, आमदार विठ्ठलराव लंघे, माजी आमदार बाळासाहेब मुरकुटे यांनी मंदिरात भेट देऊन त्रिवेणीश्वर महादेवाचे दर्शन घेतले आणि उत्सवात सहभागी झाले. महंत रमेशानंदगिरीजी महाराजांनी सर्व भाविकांचे हसतमुखाने स्वागत केले. हा उत्सव नेवासा तालुक्यातील धार्मिक आणि सांस्कृतिक परंपरेचे उत्तम उदाहरण ठरला.
