Newasa News : मराठी भाषेचा गौरव वाढवताना शालेय विद्यार्थ्यांमध्ये वाचनाची सवय रुजवण्याच्या उद्देशाने जिल्हा परिषद अहिल्यानगरच्या शिक्षण विभागामार्फत राबवण्यात येत असलेल्या “कुसुमाग्रज वाचन अभियान” अंतर्गत एका महत्त्वपूर्ण उपक्रमाची साक्षीदार ठरली भालगाव येथील जिल्हा परिषद प्राथमिक सेमी-इंग्रजी शाळा. आज या शाळेत ग्रंथदिंडी काढून कुसुमाग्रज बाल वाचनालय आणि शिक्षक वाचनालय कक्षाचे उद्घाटन उत्साहात पार पडले. या कार्यक्रमात “कुसुमाग्रज वाचन अभियान” अंतर्गत वाढदिवसानिमित्त (किंवा इतर खास प्रसंगी) फक्त खर्चिक कार्यक्रमाऐवजी पुस्तके भेट देऊन वाचन चळवळीला प्रोत्साहन देण्याचा संकल्प विद्यार्थी, शिक्षक, पालक आणि ग्रामस्थांनी एकत्रितपणे केला. हा संकल्प मांडताना सर्वांनी पुढाकार घेण्याचे आवाहन केले. उद्घाटन सोहळ्याचे वैशिष्ट्य जिल्हा परिषद अहिल्यानगरचे मुख्य कार्यकारी अधिकारी आनंद भंडारी आणि प्राथमिक शिक्षणाधिकारी भास्कर पाटील यांच्या संकल्पनेतून सुरू झालेल्या या अभियानांतर्गत भालगाव शाळेतील वाचनालयाचे उद्घाटन शाळा व्यवस्थापन समितीचे अध्यक्ष रमेश तनपुरे यांच्या हस्ते फीत कापून करण्यात आले. व्यासपीठावर उपसरपंच बाळासाहेब आहेर, सोसायटीचे चेअरमन युवराज तनपुरे, पोलीस पाटील बाळकृष्ण भागवत, युवानेते गणेश कोरडे, सदस्य अरुण खरात आदी मान्यवर उपस्थित होते. कार्यक्रमातील प्रमुख ठळक मुद्दे – मुख्याध्यापिका सरस्वती लोंढे यांनी सर्व पाहुण्यांचे हृदयस्पर्शी स्वागत केले. – प्रास्ताविक शिक्षक राहुल आठरे यांनी केले. त्यांनी कुसुमाग्रज वाचन चळवळीच्या माध्यमातून विद्यार्थी, पालक, ग्रामस्थ आणि शाळेचे माजी विद्यार्थी यांनी आपल्या वाढदिवसाचे साजरे करण्यासाठी पुस्तके भेट देण्याचा संकल्प मांडला. – शिक्षिका जनाबाई जाधव, राज्य आदर्श शिक्षिका शितल झरेकर, पल्लवी तरवडे, अमोल तुपे यांनी या उपक्रमासाठी सर्वांनी पुढाकार घ्यावा, असे आवाहन केले. – विस्तार अधिकारी रुकसाना शेख, केंद्रप्रमुख बाळासाहेब काशीद यांनी या उपक्रमाचे कौतुक केले. – ग्रामपंचायत कार्यालयाच्या वतीने सरपंच मंगल खरात आणि ग्रामसेविका वैशाली सानप यांनी सुमारे दोन हजार रुपयांच्या विविध उपयुक्त पुस्तकांची भेट दिली. विद्यार्थ्यांचे योगदान कार्यक्रमात विद्यार्थ्यांनी वाचलेल्या विविध पुस्तकांचे सारांश सादर केले, ज्यामुळे उपस्थितांची वाहवा मिळाली. यामुळे वाचनाची गोडी निर्माण होण्यास मदत झाली. शिक्षक राहुल आठरे यांनी उपस्थितांचे आभार मानले. पालकांनी मोठ्या संख्येने उपस्थित राहून या उपक्रमाला पाठिंबा दिला. हा उपक्रम अहिल्यानगर जिल्ह्यातील शालेय वाचन संस्कृतीला नवे बळ देणारा ठरला असून, यापुढे अशा प्रकारे वाढदिवस साजरे करण्याची प्रथा रुजेल, अशी अपेक्षा व्यक्त केली जात आहे. कुसुमाग्रजांच्या नावाने राबवले जाणारे हे अभियान मराठी वाचन चळवळीला नवी दिशा देणारे ठरेल. “भालगाव शाळेमध्ये सुरू झालेल्या कुसुमाग्रज वाचन अभियानांतर्गत विद्यार्थी, शिक्षक, ग्रामस्थ व पालक यांच्या वाढदिवसा निमित्ताने वाचन चळवळीस पुस्तके भेट देण्याचा संकल्प अत्यंत स्तुत्य आहे.विद्यार्थ्यांच्या वाचन संस्कृतीच्या जतनासाठी समाजाने पुढाकार घ्यावा.या अभियानाच्या माध्यमातून वाचन संस्कृतीची जोपासना केली जाणार आहे. -साहित्यिक डॉ.संजय कळमकर प्रभारी गटशिक्षणाधिकारी पं.स. नेवासा
