श्रीक्षेत्र नेवासा येथून आळंदीच्या धर्तीवर निघालेला ग्रंथराज श्री ज्ञानेश्वरी आषाढी पायी दिंडी पालखी सोहळा मंगळवारी (दि. १ जुलै २०२५) दुपारी टेंभुर्णी (ता. माढा, जि. सोलापूर) येथे विश्रांतीसाठी थांबला. यावेळी वारकरी शिक्षण संस्था, आळंदी येथील शांतीब्रह्म मारुती महाराज कुऱ्हेकर यांनी या सोहळ्याला भेट देऊन ज्ञानेश्वर माऊलींच्या पालखीचे दर्शन घेतले. त्यांच्या उपस्थितीमुळे वारकऱ्यांमध्ये आनंदाचे वातावरण निर्माण झाले.

श्री ज्ञानेश्वर देवस्थान, नेवासा यांच्यावतीने वेदांताचार्य देविदास महाराज म्हस्के यांनी मारुती महाराजांचे स्वागत केले. जोग महाराजांनी सुरू केलेली वारकरी संप्रदायाची परंपरा पुढे नेण्याचे कार्य मारुती महाराज कुऱ्हेकर करीत असून, वारकरी शिक्षण संस्थेमार्फत सुसंस्कारित वारकरी घडवण्याचे महत्त्वपूर्ण कार्य ते करीत आहेत. यावेळी त्यांनी या पालखी सोहळ्याचे कौतुक करत, हा सोहळा भविष्यात आळंदीप्रमाणेच विशाल होईल, असा आशावाद आणि आशीर्वाद व्यक्त केला.