Newasa News : रविवारी सकाळच्या आल्हाददायक वातावरणात ढोरजळगावचा परिसर (Newasa News) एका वेगळ्याच ऊर्जेने आणि शिस्तीने भारून गेला होता. निमित्त ठरले त्रिमूर्ती पावन प्रतिष्ठान संचलित शिक्षणमहर्षी साहेबरावजी घाडगे पाटील शैक्षणिक, सांस्कृतिक व क्रीडा संकुलाच्या वतीने आयोजित वार्षिक सैनिक प्रशिक्षण २०२६ अंतर्गत घेण्यात आलेली ‘विजयी धाव’ ही भव्य मॅरेथॉन स्पर्धा.

या ऐतिहासिक व थरारक मॅरेथॉन स्पर्धेचा शुभारंभ कर्नल के.पी.सिंग, शैक्षणिक संकुलाचे मार्गदर्शक सुखदेव पाटील कराड तसेच पोलीस कॉन्स्टेबल संदीप पाटील गिऱ्हे यांच्या प्रमुख उपस्थितीत मोठ्या दिमाखात (Newasa News) करण्यात आला.

यावेळी संकुलाचे प्रशासक सचिनराव कर्डिले, वरिष्ठ कॉलेजचे प्राचार्य सुनील चोळके, फार्मसी कॉलेजचे प्राचार्य विनोद भोईटे, उपप्राचार्य गिऱ्हे, प्राचार्य आशिष भारती, पब्लिक स्कूलचे प्राचार्य संजय बुधवंत, नवनाथ उकिर्डे, श्रीराम बडे आणि डॉ. देविदास देशमुख यांसारखे अनेक मान्यवर उपस्थित होते.

शिक्षणमहर्षी साहेबरावजी घाडगे पाटील शैक्षणिक संकुलातून या मॅरेथॉनला अतिशय शिस्तबद्ध आणि उत्साही वातावरणात हिरवा कंदील दाखवण्यात आला. २०० धावपटूंनी संकुलातून निघून थेट तेलकुडगाव येथील छत्रपती शिवाजी महाराज स्मारकापर्यंत धाव घेतली. त्या ठिकाणी दुसरे टोकन घेतल्यानंतर धावपटूंनी पुन्हा संकुलाच्या दिशेने परतीची विजयी धाव ठोकली. धावपटूंच्या सुरक्षिततेची पूर्ण काळजी घेत मार्गावर तत्पर वैद्यकीय पथक आणि सुविधा उपलब्ध करून देण्यात आली होती.

स्पर्धा यशस्वी करण्यासाठी त्रिमूर्ती शैक्षणिक संकुलाच्या चमूने विशेष परिश्रम घेतले. यामध्ये मेजर परमेश्वर कसाळ, मेजर प्रशांत खताळ, मेजर सचिन करोतीया, मेजर इम्रान खान, मेजर शेख आसिफ यांच्यासह प्रशिक्षक आकाश मिसाळ, दीपक कोठे, प्रशांत थोरात, रविंद्र कोकरे यांनी मोलाची भूमिका बजावली.याशिवाय सर्व विभागप्रमुख, शिक्षकवृंद, शिक्षकेतर कर्मचारी, विद्यार्थी व क्रीडाप्रेमींनी मोठ्या संख्येने उपस्थित राहून धावपटूंचा उत्साह वाढवला.

विद्यार्थ्यांमध्ये केवळ शारीरिक तंदुरुस्तीच नव्हे, तर लोखंडी शिस्त, चिकाटी, आत्मविश्वास, नेतृत्वगुण आणि राष्ट्रसेवेची ज्वलंत भावना निर्माण व्हावी, याच मुख्य उद्देशाने या थरारक मॅरेथॉनचे आयोजन (Newasa News) करण्यात आले होते. परिसरातील नागरिक, पालक आणि क्रीडाप्रेमींनी या अनोख्या शिस्तबद्ध उपक्रमाचे मनापासून कौतुक केले.