Newasa News : नेवासे तालुक्यातील (Newasa News) सुरेशनगर – हंडिनिमगाव शिवारातील ‘शिनाई ट्रेडिंग’ या भुसार मालाच्या दुकानाचे शटर मध्यरात्री उचकटून अज्ञात चोरट्यांनी तब्बल १ लाख ५ हजार रुपये किमतीचे सोयाबीन लंपास केले होते. या धाडसी घरफोडीमुळे परिसरात मोठी खळबळ उडाली होती.

दुकानाचे मालक प्रदीप भनगे यांच्या तक्रारीवरून नेवासे पोलीस ठाण्यात भारतीय न्याय संहितेच्या संबंधित कलमांनुसार गुन्हा दाखल करण्यात आला. मात्र, घटनास्थळी कोणताही ठोस पुरावा नसताना ही चोरी नेमकी कोणी केली, याविषयी गूढ निर्माण झाले होते.

या प्रकरणाचे (Newasa News) गांभीर्य ओळखून अहिल्यानगरचे पोलीस अधीक्षक मुम्मका सुदर्शन यांनी स्थानिक गुन्हे शाखेला तपासाचे आदेश दिले. स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली सपोनि दत्तात्रय दरवडे आणि त्यांच्या पथकाने समांतर तपास सुरू केला.

तांत्रिक विश्लेषण आणि गुप्त बातमीदारांचे जाळे पसरवून पथक रात्रंदिवस माग काढत असताना अखेर पोलिसांना तो महत्त्वाचा सुगावा लागला. ही चोरी स्थानिक चोरांनी नव्हे, तर बुलढाणा आणि जालना भागातील एका सराईत आंतरजिल्हा टोळीने केल्याचे निष्पन्न झाले.

मिळालेल्या खात्रीशीर माहितीच्या आधारे पोलिसांनी बुलढाणा जिल्ह्यातील देऊळगाव राजा येथे छापा टाकून भानुदास बाबूराव गायकवाड (वय ३३) याला ताब्यात घेतले. पोलिसी खाक्या दाखवताच त्याने गुन्हा कबूल केला आणि संपूर्ण कटाचा पर्दाफाश झाला. त्यानंतर पथकाने तातडीने जाळे पसरवून जालना जिल्ह्यातून विनोद विठ्ठल काळे (रा. लोणगाव, ता. भोकरदण) आणि अंकुश तेजराव खंदारे (रा. संतफळ, ता. जाफराबाद) यांना जेरबंद केले.

पोलिसांनी या तिघांकडून चोरीस गेलेले १८.८० क्विंटल सोयाबीन, ज्याची किंमत १ लाख २६ हजार ७६० रुपये आहे, असा मुद्देमाल हस्तगत केला. या गुन्ह्यात आकाश शंकर मोरे (रा. देऊळगाव राजा, जि. बुलढाणा) आणि बळीराम राजसाहेब फुके (रा. अमरखेडा, जि. जालना) हे दोघे अद्याप फरार असून पोलीस त्यांचा कसून शोध (Newasa News) घेत आहेत.

पकडलेल्या तीनही आरोपींना पुढील कारवाईसाठी नेवासे पोलिसांच्या ताब्यात देण्यात आले आहे. अहिल्यानगर स्थानिक गुन्हे शाखेने अतिशय शिताफीने रचलेल्या या सापळ्यामुळे आंतरजिल्हा टोळीचा पर्दाफाश झाला असून परिसरातील व्यापाऱ्यांनी सुटकेचा निःश्वास सोडला आहे.