Newasa News : नेवाशात अवैध धंद्यांचा ‘ओपन’ बाजार; पोलिसांचे आवाहन की जनतेची दिशाभूल? खाकीच्या भूमिकेवर मोठं प्रश्नचिन्ह!
नेवासे शहरासह (Newasa News) संपूर्ण परिसरातील हॉटेल, लॉजिंग आणि मुख्य वर्दळीच्या ठिकाणी बिंगो, मटका, पत्त्यांचे क्लब तसेच नद्यांमधून होणारा अवैध वाळू उपसा असे अनेक काळे धंदे पुन्हा एकदा राजरोसपणे सुरू झाल्याची जोरदार चर्चा सध्या नागरिकांमध्ये रंगली आहे.

Newasa News : नेवासे शहरासह (Newasa News) संपूर्ण परिसरातील हॉटेल, लॉजिंग आणि मुख्य वर्दळीच्या ठिकाणी बिंगो, मटका, पत्त्यांचे क्लब तसेच नद्यांमधून होणारा अवैध वाळू उपसा असे अनेक काळे धंदे पुन्हा एकदा राजरोसपणे सुरू झाल्याची जोरदार चर्चा सध्या नागरिकांमध्ये रंगली आहे.
दिवसाढवळ्या आणि कोणत्याही भीतीशिवाय सुरू असलेले हे गैरप्रकार पाहून शहरातील कायदा व सुव्यवस्थेचा प्रश्न ऐरणीवर आला असून सर्वसामान्य नागरिकांमध्ये भीतीचे वातावरण निर्माण झाले आहे.
स्थानिक गुन्हे शाखेने नुकतीच या अवैध धंद्यांवर धडक कारवाई केल्यानंतर आता नेवासा पोलिसांनीही (Newasa News) ‘यापुढे अवैध धंदे चालू देणार नाही’ असा आक्रमक पवित्रा घेतला आहे. मात्र, पोलिसांची ही भूमिका केवळ तात्पुरता ‘आव’ आणण्यापुरती आहे की हे धंदे कायमस्वरूपी बंद होणार, असा थेट सवाल आता जनतेतून उपस्थित केला जात आहे.
शहरासह ग्रामीण भागात उघडपणे सुरू असलेले हे अवैध अड्डे स्थानिक पोलिसांच्या नजरेतून कसे सुटतात, याबद्दल नागरिकांमध्ये तीव्र संताप व्यक्त होत आहे. एकीकडे अवैध धंदे बिनधास्तपणे सुरू असताना दुसरीकडे पोलिसांकडून ‘आम्हाला माहिती द्या’ असे आवाहन केले जात आहे.
रस्त्यावरून जाताना सर्वसामान्यांना स्पष्ट दिसणारे हे अड्डे पोलिसांना नेमके का दिसत नाहीत, असा परखड प्रश्न नागरिक विचारत आहेत. या प्रकारामुळे ‘उलटा चोर कोतवाल को डांटे’ अशी भावना जनतेत निर्माण झाली असून, माहिती देण्याचे आवाहन करून पोलीस जनतेचीच दिशाभूल करत असल्याची चर्चा चौकाचौकात रंगली आहे.
या वाढत्या अवैध धंद्यांचा सर्वाधिक फटका परिसरातील तरुण पिढीला बसत असून पालक वर्ग प्रचंड चिंतेत सापडला आहे. बिंगो, मटका आणि जुगाराच्या नादापायी तरुणाई व्यसनाच्या आहारी जात असून कष्टाचा पैसा जुगारात उधळला जात आहे. यातूनच घराघरात कौटुंबिक कलह आणि कर्जबाजारीपणाचे प्रमाण वाढत चालले आहे.
दुसरीकडे, बेसुमार अवैध वाळू उपशामुळे नद्यांचे पात्र उद्ध्वस्त होत असून पर्यावरणाची मोठी हानी होत आहे. या गंभीर प्रकारांवर कठोर कारवाई करण्याऐवजी अवैध धंदे चालवणारी मंडळीच पोलीस ठाण्यात जाऊन चहापान घेताना दिसत असल्याचा धक्कादायक आरोपही नागरिकांकडून केला जात आहे.
लोकशाही व्यवस्थेत पोलिसांवर जनतेचा मोठा विश्वास असतो आणि तो विश्वास टिकवण्यासाठी आता केवळ पोकळ आवाहने करून चालणार नाही, अशी स्पष्ट भूमिका नेवासेकरांनी घेतली आहे. केवळ स्थानिक गुन्हे शाखेच्या कारवाईवर अवलंबून न राहता स्थानिक पोलिसांनी शहरातील सर्व हॉटेल आणि लॉजिंगची सखोल तपासणी करून हे अड्डे मुळासकट उखडून टाकावेत.
तसेच, दररोजची गस्त वाढवून कारवाईनंतर हे धंदे पुन्हा सुरू होणार नाहीत याची जबाबदारी निश्चित करावी आणि वरिष्ठ पोलीस अधिकाऱ्यांनी यात वैयक्तिक लक्ष घालून निष्पक्ष कारवाई करावी, अशी ठाम मागणी आता सर्वसामान्य नागरिकांतून (Newasa News) जोर धरू लागली आहे.






