Newasa : शानदार आणि रुबाबदार म्हणून जुन्या काळापासून तर थेट आताच्या जमान्यातही ओळख कायम असलेली ‘बुलेट’ मोटारसायकल आजही सर्वांची पहिली पसंत असते. मात्र, याच मोटारसायकलच्या सायलेन्सरमध्ये काही बदल करुन बुलेटची सवारी भरधाव वेगात चालवून रेस केली की, अचानक फटाका फुटल्यासारखा मोठा आवाज येतो.

रात्रीच्या सुमारास अश्याच काही बुलेट चालकांचा नेवासा परिसरात धुमाकुळ सुरू असून, त्यामुळे आजारी व्यक्ती व ज्येष्ठ नागरिकांना याचा मोठा मनस्ताप सहन करण्याची वेळ आलेली आहे. या बुलेटसवारी चालकांना आता पोलीसांना चांगलाच कानमंत्र देण्याची गरज निर्माण झाली आहे.

गुंड, गुन्हेगार तसेच काही बेशिस्त युवकांची सध्या ही आवड बनली आहे. सायंकाळच्यावेळी सामसूम अशा वातावरणात बुलेटस्वार युवक, कर्णकर्कश सायलेन्सरचा उपद्रव कायम ठेवून इतरांच्या कानाचे पडदे फाडतील? असे फटाके फोडत सध्या बुलेटस्वार आपला रुबाब रस्त्यावरुन दाखवत फिरत आहे.

कधी काळी सैन्यदल आणि पोलीसांकडे दिसणारी ही बुलेट आता गुंड आणि बेशिस्त युवकांची धडकन बनलेली आहे. मात्र या बुलेट चालकांची सवारी सध्या रस्त्यावरुन येता-जाता फटाके फोडत असल्यामुळे सामान्य नागरिकांसह व्यावसायिकांना मोठा त्रास सहन करावा लागतो आहे.

त्यामुळे लवकरच नेवासा पोलीसांनी या बुलेटस्वरांना चांगलाच कानमंत्र देण्याची गरज आहे अन्यथा सर्वत्र बुलेटच्या सायलेन्सरच्या आवाजाचा धुमाकूळ उठण्याची शक्यता नाकारता येत आणि याच मोठा त्रास सुज्ञ नागरिकांना होणार असल्याचं बोललं जात आहे. त्यामुळे नेवासा पोलिसांनी लवकरात लवकर अश्या बुलेट चालकांविरोधात ऍक्शन घेणे गरजेचे आहे.