बीड: मस्साजोग गावचे सरपंच संतोष देशमुख यांच्या हत्येप्रकरणी बीड जिल्हा न्यायालयात सुनावणी सुरू झाली आहे. दोन दिवसांपूर्वी झालेल्या पहिल्या सुनावणीत विशेष सरकारी वकील उज्ज्वल निकम यांनी उपस्थित राहून आरोपींच्या क्रूर कृत्यांचा पर्दाफाश केला. सीआयडीच्या तपासात हा खून खंडणीसाठी झाल्याचं समोर आलं असून, आरोपींनीही याची कबुली दिल्याचं निकम यांनी माध्यमांना सांगितलं. मात्र, या प्रकरणात आता नवे धक्कादायक खुलासे समोर येत आहेत. आठवा आरोपी कृष्णा आंधळे सध्या फरार असून, पोलिस त्याचा शोध घेत आहेत. दरम्यान, संतोष देशमुख हत्येत सुग्रीव कराड या व्यक्तीचं नाव पुढे आलं आहे, ज्यामुळे या प्रकरणाला नवं वळण मिळालं आहे. आरोपींच्या कबुलीजबाबातून नवं वास्तव – संतोष देशमुख हत्येतील आरोपी जयराम चाटे आणि महेश केदार यांनी पोलिसांना दिलेल्या कबुलीजबाबात खंडणीचा उल्लेख टाळला आहे. त्याऐवजी त्यांनी एक वेगळीच कहाणी सांगितली. त्यांच्या मते, सुदर्शन घुले या व्यक्तीच्या अपमानाचा बदला घेण्यासाठी ही हत्या घडवली गेली. फरार आरोपी कृष्णा आंधळेने त्यांना सांगितलं होतं की, संतोष देशमुख यांना धडा शिकवायचा आहे. या दोघांनी असंही म्हटलं की, सुग्रीव कराडच्या सांगण्यावरूनच संतोष देशमुख आणि मस्साजोगच्या ग्रामस्थांनी सुदर्शन घुलेला मारहाण केली होती. या मारहाणीमुळे सुदर्शन आणि वाल्मिक कराड यांची बदनामी झाली, आणि त्याचा सूड म्हणून हे हत्याकांड घडलं, असा दावा चाटे आणि केदार यांनी केला आहे. सुग्रीव कराड कोण आहे? – सुग्रीव कराड हा बीड जिल्ह्यातील केज तालुक्यातील रहिवासी आहे आणि स्थानिक पातळीवर गुंड म्हणून ओळखला जातो. त्याने आमदार धनंजय मुंडे आणि वाल्मिक कराड यांच्यासोबत राजकीय काम केलं आहे. केज नगरपंचायत निवडणुकीत त्याने खासदार बजरंग सोनवणेंच्या मुलीचा (डॉ. हर्षदा) पराभव करून आपली ताकद दाखवली होती. लोकसभा निवडणुकीपर्यंत तो सोनवणेंचा कट्टर विरोधक होता, पण आता तो त्यांच्यासोबत आहे. राजकीय प्रभाव असलेला सुग्रीव याने पंचायत समिती निवडणुकीत आपल्या आईला निवडून आणलं आहे. त्याच्या या पार्श्वभूमीमुळे संतोष देशमुख हत्येप्रकरणात त्याच्या सहभागाबाबत अनेक प्रश्न उपस्थित होत आहेत. प्रकरणात नवं वळण – सीआयडीच्या तपासात खंडणीसाठी हत्या झाल्याचं सांगितलं गेलं असलं, तरी जयराम चाटे आणि महेश केदार यांच्या कबुलीजबाबाने वेगळीच थिअरी समोर आणली आहे. त्यांनी सुग्रीव कराडचं नाव घेतल्यानं तपासाला नवं दिशादर्शन मिळालं आहे. सुदर्शन घुलेच्या मारहाणीचं कारण आणि त्यामागील वैमनस्य याचा तपास आता पोलिसांसमोर आव्हान ठरत आहे. फरार कृष्णा आंधळेच्या अटकेनंतर या प्रकरणातील आणखी रहस्य उलगडण्याची शक्यता आहे. सध्या बीड जिल्ह्यात या हत्याकांडाची जोरदार चर्चा सुरू असून, पुढील सुनावणीवर सर्वांचं लक्ष लागलं आहे.
