Toxic Movie : दाक्षिणात्य सुपरस्टार यशच्या चाहत्यांसाठी बहुप्रतीक्षित ‘टॉक्सिक’ अखेर मोठ्या पडद्यावर येण्यासाठी सज्ज झाला आहे. ‘केजीएफ’नंतर यशची देशभरात निर्माण झालेली क्रेझ पाहता या चित्रपटाकडून मोठ्या बॉक्स ऑफिस कलेक्शनची अपेक्षा व्यक्त केली जात आहे.

विशेष म्हणजे, चित्रपट प्रदर्शित होण्याआधीच त्याची लोकप्रियता ॲडव्हान्स बुकिंगच्या आकडेवारीतून स्पष्ट होत आहे. २६ ऑगस्ट रोजी ‘टॉक्सिक’ चित्रपटगृहात दाखल होणार असून, २१ ऑगस्टपासून त्याच्या तिकिटांची ॲडव्हान्स बुकिंग सुरू झाली.

बुकिंग सुरू होताच चाहत्यांनी तिकिटांसाठी अक्षरश: झुंबड उडवली असून, अवघ्या पहिल्या २४ तासांत लाखो तिकिटांची विक्री झाल्याची माहिती समोर आली आहे. त्यामुळे रिलीजच्या आधीच ‘टॉक्सिक’ने बॉक्स ऑफिसवर वातावरण तापवलं असून, यश पुन्हा एकदा विक्रमांच्या दिशेने वाटचाल करत असल्याचं चित्र आहे.

‘टॉक्सिक’च्या ॲडव्हान्स बुकिंगला पहिल्या दिवसापासूनच जबरदस्त प्रतिसाद मिळत आहे. बुकिंग सुरू झाल्यानंतर अवघ्या २४ तासांत तब्बल २.५ लाख तिकिटांची विक्री झाल्याची माहिती समोर आली आहे. एवढंच नाही, तर रविवार सकाळपर्यंत ‘बुकमायशो’वर दर तासाला १० हजारांहून अधिक तिकिटांची विक्री होत असल्याचं सांगितलं जात आहे.

सर्व भाषांमधील बुकिंगचा विचार केला तर आतापर्यंत जवळपास ४.७ लाख तिकिटे विकली गेल्याचा दावा केला जात आहे. त्यामुळे चित्रपट प्रदर्शित होण्यास अजून काही दिवस बाकी असतानाच ‘टॉक्सिक’ने ॲडव्हान्स बुकिंगमध्ये मोठी आघाडी घेतली आहे.

हिंदीतही यशचा ‘क्रेझी’ फॅनबेस

यशची लोकप्रियता ‘केजीएफ’च्या यशानंतर कर्नाटकापुरती किंवा दक्षिण भारतापुरती मर्यादित राहिलेली नाही. हिंदी पट्ट्यातही यशचा मोठा चाहतावर्ग तयार झाला आहे. ‘केजीएफ’च्या दोन्ही भागांनी हिंदी प्रेक्षकांमध्ये निर्माण केलेली क्रेझ ‘टॉक्सिक’च्या ॲडव्हान्स बुकिंगमध्येही दिसून येत आहे.

रविवार सकाळी ८ वाजेपर्यंतच्या आकडेवारीनुसार, ‘टॉक्सिक’च्या हिंदी आवृत्तीने ॲडव्हान्स बुकिंगमधून ८ कोटी रुपयांहून अधिक कमाई केल्याचं सांगितलं जात आहे.

दुसरीकडे, कन्नड आवृत्तीनेही १० कोटी रुपयांचा टप्पा पार केला आहे. म्हणजेच हिंदी आणि कन्नड या दोन भाषांमधूनच चित्रपटाच्या ॲडव्हान्स बुकिंगची कमाई १८ कोटी रुपयांपेक्षा जास्त झाल्याचं समोर येत आहे.

‘टॉक्सिक’ मोडणार कोणते विक्रम?

२६ ऑगस्टला ‘टॉक्सिक’ थिएटरमध्ये दाखल झाल्यानंतर आता सर्वांचं लक्ष पहिल्या दिवसाच्या कलेक्शनकडे लागलं आहे. ॲडव्हान्स बुकिंगचा हा वेग कायम राहिला, तर चित्रपटाच्या पहिल्या दिवसाच्या कमाईचा आकडा मोठा असण्याची शक्यता आहे.

यशचा स्टारडम, ‘केजीएफ’नंतर वाढलेली लोकप्रियता आणि ‘टॉक्सिक’बाबत निर्माण झालेली उत्सुकता या तिन्हींचा फायदा चित्रपटाला मिळताना दिसत आहे.