Eetha Title Dispute: श्रद्धा कपूरचा आगामी ‘ईठा’ हा चित्रपट प्रदर्शित होण्यापूर्वीच वादाच्या भोवऱ्यात सापडला आहे. महाराष्ट्रातील प्रसिद्ध तमाशा आणि लावणी कलाकार विठाबाई भाऊ मांग नारायणगावकर यांच्या जीवनावर हा चित्रपट आधारित आहे. मात्र, चित्रपटाच्या नावात विठाबाईंचे नाव नसल्यामुळे राष्ट्रवादी काँग्रेस पक्ष (शरद पवार गट) आणि विठाबाईंच्या कुटुंबीयांनी आक्षेप घेतला आहे. चित्रपटाच्या शीर्षकात बदल करून त्यात विठाबाईंचे नाव समाविष्ट करावे, अशी मागणी करण्यात आली आहे.

राष्ट्रवादी काँग्रेस (शरद पवार गट) मुंबई सांस्कृतिक विभागाचे अध्यक्ष सुहास सूर्यवंशी यांनी या विषयावर भूमिका मांडताना सांगितले की, विठाबाई नारायणगावकर या महाराष्ट्राच्या सांस्कृतिक परंपरेतील अत्यंत महत्त्वाच्या व्यक्तिमत्त्वांपैकी एक आहेत. लावणी आणि तमाशा या लोककलेला त्यांनी नवे स्थान मिळवून दिले. त्यामुळे त्यांच्या जीवनावर चित्रपट तयार करताना त्यांच्या नावालाही योग्य तो मान मिळायला हवा.

सूर्यवंशी म्हणाले की, आम्ही चित्रपटाला विरोध करत नाही. उलट, विठाबाईंचा प्रेरणादायी जीवनप्रवास मोठ्या पडद्यावर दाखवला जात असल्याचे स्वागतच आहे. मात्र, त्यांच्या नावाशिवाय चित्रपटाचे शीर्षक ठेवणे योग्य वाटत नाही. त्यामुळे चित्रपटाच्या नावात विठाबाईंचा उल्लेख असावा, अशी आमची अपेक्षा आहे.

यावेळी त्यांनी विठाबाईंच्या आयुष्यातील एक प्रेरणादायी प्रसंगही सांगितला. त्यांच्या मते, विठाबाई आपल्या कलेप्रती इतक्या समर्पित होत्या की, गर्भवती असतानाही त्यांनी कार्यक्रम करणे थांबवले नव्हते. एका कार्यक्रमादरम्यान त्यांनी बाळाला जन्म दिला आणि काही वेळानंतर पुन्हा रंगमंचावर येऊन आपला कार्यक्रम पूर्ण केला. त्यांच्या या समर्पणामुळेच त्या महाराष्ट्रातील लोककलेचे मोठे नाव ठरल्या.

सूर्यवंशी यांनी ‘विठा’ या शब्दाचाही उल्लेख केला. त्यांच्या म्हणण्यानुसार, या शब्दाचा संबंध विठाबाईंच्या जन्मभूमी पंढरपूरशी जोडला जातो. त्यामुळे चित्रपटात त्यांच्या जीवनाबरोबरच या सांस्कृतिक आणि धार्मिक संदर्भांचाही योग्य सन्मान राखला जावा, अशी अपेक्षा त्यांनी व्यक्त केली.

याशिवाय, चित्रपट प्रदर्शित होण्यापूर्वी तो विठाबाईंच्या कुटुंबीयांना आणि त्यांच्याशी संबंधित व्यक्तींना दाखवावा, अशीही मागणी करण्यात आली आहे. त्यामुळे चित्रपटात त्यांच्या जीवनाचे वास्तव आणि सन्मानपूर्वक चित्रण झाले आहे की नाही, याची खात्री करता येईल, असे त्यांचे मत आहे.

विठाबाई नारायणगावकर या महाराष्ट्रातील सर्वात लोकप्रिय लोककलाकारांपैकी एक मानल्या जातात. त्यांना ‘तमाशा सम्राज्ञी’ आणि ‘लावणी सम्राज्ञी’ म्हणूनही ओळखले जाते. त्यांच्या कलेने अनेक दशकांपर्यंत प्रेक्षकांना भुरळ घातली असून आजही त्यांचे नाव आदराने घेतले जाते.

दरम्यान, या वादावर चित्रपटाचे दिग्दर्शक लक्ष्मण उतेकर किंवा निर्मात्यांकडून अद्याप कोणतीही अधिकृत प्रतिक्रिया देण्यात आलेली नाही. श्रद्धा कपूर या चित्रपटात विठाबाई नारायणगावकर यांची भूमिका साकारणार असून, हा चित्रपट 28 ऑगस्ट 2026 रोजी प्रदर्शित होणार आहे. आता निर्माते चित्रपटाचे शीर्षक बदलतात की नाही, याकडे सर्वांचे लक्ष लागले आहे.