नेवासा (राजेंद्र वाघमारे) : नुकत्याच झालेल्या विधानसभा निवडणुकीत राजकीय वैर पत्करलेले माजी आमदार बाळासाहेब मुरकुटे आणि विद्यमान आमदार विठ्ठलराव लंघे-पाटील पुन्हा एकदा एकत्र येण्याच्या तयारीत आहेत. स्थानिक स्वराज्य संस्थांच्या आगामी निवडणुकीत, विशेषतः जिल्हा परिषद आणि पंचायत समिती निवडणुकीत, हे दोन्ही नेते महायुतीच्या बॅनरखाली एकजुटीने लढण्याची शक्यता आहे. मुरकुटे यांचा भारतीय जनता पक्षात (भाजप) पुन्हा प्रवेश आणि लंघे यांच्यासोबतची दिलजमाई यामुळे कार्यकर्त्यांमध्ये उत्साहाचे वातावरण आहे. या एकजुटीने विरोधकांवर कशी मात केली जाईल, याकडे राजकीय निरीक्षकांचे लक्ष लागले आहे.

विधानसभेत बंडखोरीने वितुष्ट –
विधानसभा निवडणुकीत मुरकुटे आणि लंघे हे दोन्ही भाजपचे बलाढ्य नेते महायुतीकडून नेवासा मतदारसंघातून निवडणूक लढवण्यास इच्छुक होते. मात्र, दोघांमध्ये समझोता न झाल्याने महायुतीच्या वरिष्ठ नेत्यांनी राजकीय खलबत्ते आखत लंघे यांना मुख्यमंत्री एकनाथ शिंदे यांच्या शिवसेनेकडून उमेदवारी दिली. यामुळे नाराज झालेल्या मुरकुटे यांनी भाजपला सोडचिठ्ठी देत बच्चू कडू यांच्या प्रहार जनशक्ती पक्षाकडून बंडखोरी करत निवडणूक लढवली. यामुळे नेवासा मतदारसंघात तिरंगी लढत रंगली आणि मुरकुटे-लंघे यांच्यात राजकीय वैर निर्माण झाले.

महायुतीत दिलजमाई –
आता स्थानिक स्वराज्य संस्थांच्या निवडणुकीच्या पार्श्वभूमीवर मुरकुटे यांना पुन्हा भाजपात आणण्यासाठी महायुतीच्या वरिष्ठ नेत्यांनी पडद्याआडून खलबत्ते सुरू केली आहेत. सूत्रांनुसार, मुरकुटे आणि लंघे यांनी जुन्या मतभेदांना मागे टाकत एकत्र येण्याचा निर्णय घेतला आहे. मुरकुटे यांचा भाजपात प्रवेश आणि लंघे यांच्यासोबतची एकजूट यामुळे “फिर वही दिल लाया” अशी दिलजमाई होण्याची शक्यता आहे. यामुळे कार्यकर्त्यांमध्येही उत्साहाचे वातावरण आहे.

निवडणुकीत एकजुटीचे प्रदर्शन –
मुरकुटे आणि लंघे यांच्या नेतृत्वाखाली महायुती जिल्हा परिषद आणि पंचायत समिती निवडणुकीत एकजुटीने उतरण्याची तयारी करत आहे. यापूर्वी २०२३ च्या नेवासा कृषी उत्पन्न बाजार समिती निवडणुकीत मुरकुटे-लंघे गटाने एकत्र येऊन आमदार शंकरराव गडाख यांच्या सहकार पॅनलला आव्हान दिले होते. आता स्थानिक स्वराज्य संस्थांच्या निवडणुकीतही ही जोडी विरोधकांवर चाल करणार का, याकडे सर्वांचे लक्ष लागले आहे.

महायुतीची रणनीती –
महायुतीच्या नेत्यांनी नेवासा मतदारसंघात एकजुटीचे प्रदर्शन करत विरोधकांना, विशेषतः महाविकास आघाडीला, शह देण्याची रणनीती आखली आहे. मुरकुटे यांचा अनुभव आणि लंघे यांचे स्थानिक पातळीवरील बळ यामुळे महायुतीला मोठे यश मिळेल, असा विश्वास कार्यकर्त्यांमध्ये आहे. या निवडणुकीत मुरकुटे-लंघे जोडी कशी कामगिरी करते, यावर नेवासाच्या राजकीय भवितव्याचा मोठा परिणाम होणार आहे.