नेवासा – त्रिमूर्ती शैक्षणिक सैनिकी संकुलाचे संस्थापक साहेबराव घाडगे पाटील (वय ७०) यांच्यावर बुधवारी, ११ जून रोजी हजारों नागरिकांच्या उपस्थितीत शोकाकुल वातावरणात अंत्यसंस्कार पार पडले. “अमर रहे… घाडगे पाटील साहेब… अमर रहे…” अशा घोषणांनी नेवासा फाटा येथील संकुल परिसर दुमदुमला. मंगळवारी (१० जून) मुंबईत मंत्रालयात संस्थेच्या कामानिमित्त गेले असताना बाथरूममध्ये पाय घसरून पडल्याने त्यांच्या डोक्याला गंभीर दुखापत झाली, ज्यामुळे त्यांचे निधन झाले.

पहाटे पाच वाजता त्यांचे पार्थिव संकुलात आणल्यानंतर सकाळी ८ ते १० दरम्यान अंत्यदर्शनासाठी ठेवण्यात आले. विद्यार्थी, पालक, शिक्षक, कर्मचारी साश्रू नयनांनी हंबरडा फोडत होते. फुलांनी सजविलेल्या रथात पार्थिव ठेवून टाळ-मृदुंगाच्या गजरात क्रीडांगणातील स्मारकावर आणले. एनसीसी कॅडेट्सनी सलामी देत मानवंदना दिली. घाडगे पाटील यांच्या कन्या स्नेहलताई घाडगे-चव्हाण पाटील यांनी पार्थिवास अग्नी दिला.

यावेळी माजी मंत्री शंकरराव गडाख परिवाराच्या वतीने सुनीताताई गडाख, आमदार विठ्ठलराव लंघे पाटील परिवाराच्या वतीने सुनीलभाऊ लंघे पाटील, ज्ञानेश्वर उद्योग समूहाच्या वतीने माजी आमदार पांडुरंग अभंग, काशिनाथ अण्णा नवले, माजी आमदार बाळासाहेब मुरकुटे, पंचायत समितीचे सहायक गटविकास अधिकारी सुरेश पाटेकर, श्रीकांत तिडके, शिवाजीराव काकडे, राष्ट्रीय स्वयंसेवक संघाचे किशोर अण्णा निर्मळ, पत्रकार संघटनेच्या वतीने सुधीर चव्हाण, मुळाचे अध्यक्ष नानासाहेब तुवर, खा. वाकचौरे मित्र मंडळाच्या वतीने बाळासाहेब सोनवणे, फाटके परिवाराच्या वतीने नानासाहेब फाटके, बेल्हेकर शिक्षण संस्थेचे अध्यक्ष डॉ.सुरेश बेल्हेकर, शरद काळे, तेलकुडगाव ग्रामस्थांच्या वतीने सतीश काळे, सचिन जगताप, यांनी साहेबराव घाडगे पाटील यांचे जीवनकार्य विषद करत श्रद्धांजली अर्पित केली.

घाडगे पाटील यांच्या पत्नी अँड. सुमतीताई घाडगे पाटील यांनी भावुक होत साहेबराव यांना “त्रिमूर्तीचे पांडुरंग” आणि कर्मयोगी संबोधले. त्यांनी गरीब-वंचितांना न्याय देण्यासाठी शेवटच्या श्वासापर्यंत कार्य केल्याचे सांगितले. संत ज्ञानेश्वर माऊलींच्या पसायदानाने सामुदायिक श्रद्धांजली अर्पित करण्यात आली. सूत्रसंचालन प्रा. अशोकराव गाडे यांनी केले. सर्वपक्षीय नेते, विद्यार्थी, एनसीसी कॅडेट्स, शेतकरी, पत्रकार, डॉक्टर, वकील आदींसह हजारो लोक उपस्थित होते. घाडगे पाटील यांच्या निधनाने नेवासा तालुक्यात हळहळ व्यक्त होत आहे.