नेवासा – “शेतकऱ्यांना सुलतानरुपी शासन लुटत आहे आणि जातीच्या प्रश्नात मातीचा प्रश्न दडवला जात आहे,” अशा आक्रमक शब्दांत प्रहार जनशक्ती पक्षाचे संस्थापक व आमदार बच्चू कडू यांनी मुख्यमंत्री देवेंद्र फडणवीस यांच्यावर जोरदार टीका केली. नेवासा तालुक्यातील भेंडा येथे सोमवारी (दि. २९ सप्टेंबर २०२५) प्रहार जनशक्ती पक्षातर्फे आयोजित ‘सातबारा कोरा’ आंदोलनाच्या जाहीर सभेत त्यांनी शेतकऱ्यांच्या व्यथा मांडल्या. ही सभा नागपूर येथे २८ ऑक्टोबर रोजी होणाऱ्या महासभेच्या तयारीचा भाग होती. भेंडा गावात झालेल्या या सभेला शेतकरी, महिला, तरुण आणि कामगार मोठ्या संख्येने उपस्थित होते. आत्महत्याग्रस्त कुटुंबांना प्रहारची मदत – सभेत आत्महत्याग्रस्त शेतकरी कुटुंबांप्रती सरकारच्या निष्काळजी धोरणावर बच्चू कडू यांनी संताप व्यक्त केला. यावेळी सरोदे आणि ठोंबळ या दोन आत्महत्याग्रस्त शेतकरी कुटुंबांना प्रहारच्यावतीने रोख स्वरूपात आर्थिक मदत प्रदान करण्यात आली. एका कुटुंबातील विधवेने भावनिक उद्गार काढताना म्हटले, “शासनापेक्षा बच्चूभाऊंनी आमच्या दुःखात खऱ्या भावासारखी साथ दिली. ही मदत आम्हाला मानसिक बळ देणारी आहे.” या प्रसंगाने प्रहार पक्ष शेतकऱ्यांसाठी ठोस पावले उचलत असल्याचे अधोरेखित झाले. फडणवीस सरकारवर थेट आरोप – आमदार बच्चू कडू यांनी मुख्यमंत्री फडणवीस यांच्यावर थेट हल्ला चढवताना म्हटले, “मुख्यमंत्री शेतकऱ्यांच्या प्रश्नांकडे जाणीवपूर्वक दुर्लक्ष करत आहेत. शेतकरी आत्महत्या करत असताना सरकारला निवडणुकीचे राजकारणच महत्त्वाचे वाटते. ठोस धोरण राबवण्यात सरकारला रस नाही. आता जनतेचा आक्रोश उफाळून येणार आहे.” त्यांनी शासनाने गाजर दाखवून फसवण्याची पद्धत बंद करावी आणि शेतकरी आत्महत्यांवर तातडीने उपाययोजना करावी, अशी मागणी केली. “हा लढा कुणाविरुद्ध नाही, तर शेतकऱ्यांच्या हक्कांसाठी आहे. सातबारा कोरा झाल्याशिवाय खरी मुक्ती नाही. सरकारला आता जनतेची ताकद दाखवावी लागेल,” असे आवाहन त्यांनी शेतकऱ्यांना केले. सत्ताधारी सत्तेच्या भिंतीवर पापी राजकारण करून शेतकऱ्यांच्या हक्कांना बाधा आणू शकत नाहीत, असेही ते म्हणाले. शेतकऱ्यांना एकजुटीचे आवाहन – यावेळी प्रहारचे युवा जिल्हाध्यक्ष अॅड. पांडुरंग औताडे यांनी प्रास्ताविक केले. बल्लूभाऊ जंजाळ, विधीज्ञ राऊत, ज्ञानेश्वर सांगळे, किशोर मिसाळ, दत्तात्रय पाटील खाटीक, भारस्कर, रघुनाथ आरगडे, त्रिंबक भदगले, सादिक शिलेदार, नागनाथ आगळे, विकास कोतकर, पांडुरंग नवले, सोमनाथ सांगळे आदी मान्यवरांनी शेतकऱ्यांच्या समस्यांवर संवाद साधत जनजागृतीचे महत्त्व अधोरेखित केले. सातबारा कोराच्या मागणीसाठी संपूर्ण महाराष्ट्रभर शेतकरी जागरूक राहावेत, असे आवाहन यावेळी करण्यात आले. ही सभा शेतकऱ्यांमधील नैराश्य आणि असंतोष व्यक्त करण्याचा महत्त्वाचा टप्पा ठरली असून, सरकारच्या शेतकरीविरोधी धोरणांविरुद्ध लढण्यासाठी प्रहार जनशक्ती पक्षाने ठोस पावले उचलल्याचे यानिमित्ताने स्पष्ट झाले.
