Nevasa News : अहिल्यानगर जिल्ह्यातील नेवासा तालुक्यात अत्यंत धक्कादायक घटना घडली आहे. श्रीक्षेत्र देवगड येथे दर्शनासाठी निघालेल्या ६३ वर्षीय अंगणवाडी सेविकेचे लिफ्ट देण्याच्या बहाण्याने अपहरण करून त्यांना दिवसभर कारमध्ये डांबून ठेवण्यात आले. त्यानंतर लोखंडी रॉडने मारहाण करत चाकूचा धाक दाखवून सुमारे ९६ हजार ७०० रुपयांचा ऐवज लुटण्यात आला. (Nevasa News)

पोलिसांनी दिलेल्या माहितीनुसार, पीडित महिला गुरुवारी (९ जुलै) देवगड फाटा येथे वाहनाची वाट पाहत उभ्या असताना सिल्व्हर रंगाच्या कारचालकाने देवगडला सोडण्याचे सांगितले. विश्वास ठेवून त्या कारमध्ये बसल्यानंतर आरोपीने वाहन देवगडकडे न नेता नेवासा परिसराकडे वळवले. (Nevasa News)

आरोपीने महिलेला दिवसभर नेवासा, नगर, शनिशिंगणापूर, सोनई आणि ब्राम्हणी परिसरात फिरवले. विरोध केल्यानंतर त्यांचा मोबाईल हिसकावून घेतला. रात्री एका निर्जन ठिकाणी नेऊन लोखंडी रॉडने त्यांच्या डोक्यावर वार केला तसेच चाकूचा धाक दाखवत गळ्यातील सुमारे ७ ग्रॅम सोन्याची पोत, ५ ग्रॅम सोन्याचे दागिने, रोख रक्कम आणि महत्त्वाची कागदपत्रे असा एकूण ९६ हजार ७०० रुपयांचा ऐवज लुटला. (Nevasa News)

त्यानंतर साडीचा पदर फाडून हात-पाय बांधले आणि जीवे मारण्याची धमकी दिली. रात्री उशिरा आरोपीने पीडित महिलेला महामार्गावर सोडून पलायन केले. उपचारानंतर त्यांनी नेवासा पोलीस ठाण्यात तक्रार दाखल केली. (Nevasa News)

घटनेचे गांभीर्य लक्षात घेऊन पोलीस निरीक्षक प्रताप दराडे यांच्या मार्गदर्शनाखाली तपास सुरू करण्यात आला. सीसीटीव्ही फुटेज आणि तांत्रिक तपासाच्या आधारे पोलिसांनी अवघ्या काही तासांत मुख्य आरोपी अशोक भानुदास तांबे (रा. सलाबतपूर, ता. नेवासा) याला अटक केली. (Nevasa News)

पोलिसांच्या माहितीनुसार, आरोपीने चौकशीदरम्यान स्वतःला पत्रकार असल्याचा दावा करत पोलिसांवर दबाव टाकण्याचा प्रयत्न केल्याची माहिती समोर आली आहे. तसेच त्याच्याकडून यापूर्वीही अशाच प्रकारच्या फसवणुकीच्या घटना घडल्या आहेत का, याचाही तपास सुरू आहे. या प्रकरणी नेवासा पोलीस ठाण्यात अपहरण, दरोडा आणि इतर संबंधित कलमांनुसार गुन्हा दाखल करण्यात आला असून पुढील तपास सुरू आहे. (Nevasa News)