Haryana Chunav Results Hissar: देशातील सर्वात श्रीमंत महिला सावित्री जिंदाल यांनी हरियाणा विधानसभा निवडणुकीत 2024 मध्ये मोठा विजय नोंदवला आहे. भारतीय जनता पक्षाने (भाजप) त्यांना तिकीट दिले नाही. त्यामुळे त्या अपक्ष उमेदवार म्हणून निवडणुकीच्या रिंगणात उतरल्या. हिसारमधून त्यांनी अपक्ष उमेदवार म्हणून निवडणूक लढवली आणि विजयी झाल्या. त्यांची स्पर्धा भाजपचे उमेदवार डॉ.कमल गुप्ता आणि काँग्रेसचे रामनिवास राडा यांच्याशी होती.

सावित्री जिंदाल या 74 वर्षांच्या आहेत आणि त्यांनी आधीच सांगितले होते की, ही आपली शेवटची निवडणूक आहे. सावित्री जिंदाल यांना 49231 मते मिळाली आणि 18941 च्या फरकाने विजयी झाल्या. त्यांच्या या शानदार विजयाबद्दल हिस्सारमध्ये मोठा जल्लोष करण्यात आला. विशेष म्हणजे त्यांचा मुलगा नवीन जिंदालही या सेलिब्रेशनमध्ये सहभागी झाले होते. आई-मुलाने खुल्या जीपमधून हिसारच्या रस्त्यावर उतरून मतदारांचे आभार मानले. नवीन हे कुरुक्षेत्र लोकसभा मतदारसंघातून भाजपचे खासदार आहेत.

फेसबुक पोस्टद्वारे कृतज्ञता –

नवीन जिंदाल यांनी फेसबुक पोस्टद्वारे आईचे अभिनंदन केले आहे. त्यांनी लिहिले – प्रिय हिसार रहिवासी, तुम्ही आई श्रीमती सावित्री जिंदाल जी यांच्यावर दाखवलेल्या प्रेम, समर्थन आणि विश्वासाबद्दल मी तुम्हा सर्वांचा मनापासून आभारी आहे.

या ऐतिहासिक विजयानंतर हिसारच्या प्रत्येक घराच्या आणि प्रत्येक व्यक्तीच्या विकासासाठी माताजी समर्पित आहेत. हा विजय म्हणजे आपल्या हिसारच्या उज्ज्वल भवितव्याकडे एक पाऊल आहे. बाऊजी श्री ओ.पी. जिंदाल जी यांची अपूर्ण स्वप्ने पूर्ण करणे ही आता आपल्या सर्वांची जबाबदारी आहे आणि ती स्वप्ने पूर्ण निष्ठेने पूर्ण करण्यासाठी माताजी कटिबद्ध आहेत. तुमचा पाठिंबा, प्रेम आणि विश्वास हीच आमची ताकद आहे. चला हिसारला विकास आणि समृद्धीच्या मार्गावर पुढे नेऊया. हिसारच्या प्रगतीसाठी तुम्ही दिलेल्या पाठिंब्याबद्दल पुन्हा एकदा धन्यवाद.

आई आणि पक्षाचा निर्णय योग्य –

सावित्री जिंदाल यांनी भाजपविरोधात केलेले बंड त्यांचे पुत्र नवीन जिंदाल यांनी सार्थ ठरवले. नवीन जिंदाल म्हणाले होते की, मी तिकीट वाटपाचा पक्षाचा निर्णय योग्य मानतो, पण मी माझ्या आईच्या निर्णयाचाही आदर करतो.

नवीन जिंदाल यांनी काँग्रेस सोडून भाजपमध्ये प्रवेश केला –

नवीन जिंदाल यांनी काँग्रेस सोडून भाजपमध्ये प्रवेश केला आहे. 2004 ते 2014 पर्यंत ते कुरुक्षेत्रचे खासदार होते. पण 2014 मध्ये मोदी लाटेत त्यांचा पराभव झाला. यानंतर त्यांनी राजकारणापासून दुरावले. नंतर त्यांनी भारतीय जनता पक्षात प्रवेश केला. 2024 च्या लोकसभा निवडणुकीत ते भाजपच्या तिकिटावर कुरुक्षेत्रमधून खासदार म्हणून निवडून आले.

सावित्री जिंदाल या भारतातील सर्वात श्रीमंत महिला –

सावित्री जिंदाल या केवळ हरियाणातीलच नव्हे तर संपूर्ण भारतातील सर्वात श्रीमंत महिला आहेत. फोर्ब्सच्या मते, सावित्री जिंदाल यांची सध्याची एकूण संपत्ती 42.2 अब्ज डाॅलर (सुमारे ₹35,43,45,38,20,000) आहे. फोर्ब्सनुसार, सावित्री जिंदाल या सध्या जगातील 40व्या श्रीमंत व्यक्ती आहेत. सावित्री जिंदाल यांचे पती आणि जिंदाल ग्रुपचे संस्थापक ओपी जिंदाल यांचा 2005 मध्ये हेलिकॉप्टर अपघातात मृत्यू झाला होता. ओपी जिंदाल यांच्या निधनानंतर कौटुंबिक व्यवसाय 4 मुलांमध्ये विभागला गेला.