NEET PG 2026 Result : वैद्यकीय पदव्युत्तर प्रवेशासाठी घेण्यात आलेल्या NEET PG 2026 परीक्षेचा निकाल जाहीर झाला आहे. राष्ट्रीय वैद्यकीय विज्ञान परीक्षा मंडळाने (NBEMS) २४ सप्टेंबर रोजी निकाल जाहीर केला. त्यामुळे अडीच लाखांहून अधिक परीक्षार्थींची प्रतीक्षा संपली आहे. उमेदवार आता NBEMSच्या अधिकृत संकेतस्थळावर जाऊन आपला निकाल तपासू शकतात.

NEET PG परीक्षेच्या निकालाची संभाव्य तारीख ३० सप्टेंबर निश्चित करण्यात आली होती. मात्र, त्याआधीच २४ सप्टेंबर रोजी निकाल जाहीर करण्यात आला. यंदाची NEET PG परीक्षा ३० ऑगस्ट रोजी घेण्यात आली होती. जयपूरमधील दोन परीक्षा केंद्रांवरील प्रभावित उमेदवारांसाठी ५ सप्टेंबर रोजी पुन्हा परीक्षा घेण्यात आली होती. NBEMSच्या अधिकृत नोंदीनुसार २४ सप्टेंबरला निकाल जाहीर करण्यात आला आहे.

या परीक्षेच्या माध्यमातून एमडी, एमएस, डीएनबी, डीआरएनबी तसेच पदव्युत्तर वैद्यकीय पदविका अभ्यासक्रमांच्या प्रवेशासाठी पात्रता निश्चित केली जाते.

असा तपासा NEET PG 2026 चा निकाल

उमेदवारांनी सर्वप्रथम NBEMSच्या अधिकृत संकेतस्थळाला भेट द्यावी. त्यानंतर परीक्षा विभागात जाऊन NEET PG निवडावे. २०२६ च्या विभागात जाऊन ‘Results’ या पर्यायावर क्लिक करावे. त्यानंतर NEET PG 2026 निकालाची लिंक उघडून आवश्यक माहिती भरावी. निकाल डाउनलोड करून त्यातील आपला रोल नंबर, गुण आणि क्रमांक तपासावा.

निकालाची प्रत पुढील प्रवेश आणि समुपदेशन प्रक्रियेसाठी जपून ठेवणे उमेदवारांसाठी महत्त्वाचे आहे. NBEMSच्या NEET PG विभागात २०२६ परीक्षेसाठी निकालाची सुविधा उपलब्ध करण्यात आली आहे.

NEET PG 2026 कटऑफ

NEET PG 2026 मध्ये सामान्य आणि ईडब्ल्यूएस प्रवर्गासाठी पात्रता कटऑफ ५०वा पर्सेंटाइल म्हणजे २६२ गुण आहे. सामान्य दिव्यांग उमेदवारांसाठी ४५वा पर्सेंटाइल म्हणजे २४४ गुण, तर अनुसूचित जाती, अनुसूचित जमाती, इतर मागासवर्गीय आणि या प्रवर्गांतील दिव्यांग उमेदवारांसाठी ४०वा पर्सेंटाइल म्हणजे २२६ गुण निश्चित करण्यात आले आहेत.