NCP Foundation Day : राष्ट्रवादी काँग्रेस पक्षाचा (अजित पवार गट) यंदाचा 27 वा वर्धापन दिन सोहळा एक दिवस पुढे ढकलण्यात आला आहे. अजितदादांच्या निधनांनतर होणाऱ्या पहिल्या वर्धापन दिनाकडे संपूर्ण राजकीय वर्तुळाचे लक्ष लागले आहे.

मात्र दरवर्षी 10 जून रोजी होणारा हा सोहळा यंदा 11 जून रोजी मुंबईतील प्रसिद्ध षण्मुखानंद हॉलमध्ये पार पडणार आहे. केवळ तारखेत बदल झाला असून जागा तीच असणार आहे.

दिल्लीतील अत्यंत महत्त्वाच्या राजकीय घडामोडींमुळे पक्षाच्या वरिष्ठ नेतृत्वाने हा निर्णय घेतला आहे. याबाबतची माहिती राष्ट्रवादी काँग्रेसचे प्रदेशाध्यक्ष खासदार सुनील तटकरे यांनी पत्रकार परिषदेत दिली. दिल्लीतील बैठक पूर्ण करून सर्व नेते परतल्यानंतर 11 जून रोजी दुपारी 2 वाजता षण्मुखानंद सभागृहातच हा सोहळा होईल.

दिल्लीत एनडीए घटक पक्षांची तातडीची बैठक

राष्ट्रवादी काँग्रेस पक्षाची स्थापना 10 जून 1999 रोजी झाली होती. मात्र या वर्षी 10 जून रोजी पंतप्रधान नरेंद्र मोदी यांनी दिल्लीत एनडीए घटक पक्षांची तातडीची बैठक बोलावली आहे. या राष्ट्रीय बैठकीला देशभरातील एनडीएचे सर्व प्रमुख घटक पक्ष, त्यांचे मुख्यमंत्री, उपमुख्यमंत्री आणि खासदार उपस्थित राहणार आहेत.

महायुती आणि एनडीएचा एक भाग म्हणून या बैठकीला उपस्थित राहणे आवश्यक असल्याने राष्ट्रवादी काँग्रेसच्या राष्ट्रीय अध्यक्षा आणि महाराष्ट्राच्या उपमुख्यमंत्री सुनेत्रा पवार, खासदार प्रफुल्ल पटेल आणि सुनील तटकरे हे 10 जून रोजी दिल्लीत असणार आहेत.

देशातील जनतेने सलग तिसऱ्यांदा नरेंद्र मोदी आणि एनडीएला देशसेवेची संधी दिली आहे. जगभरात युद्धाचे सावट असतानाही भारताने केलेली प्रगती आणि एनडीए सरकारच्या मागील दोन वर्षांच्या पूर्ततेचा आढावा या बैठकीत घेतला जाईल. तसेच एनडीएच्या भक्कम एकसंघ वाटचालीचे मंथन या बैठकीत होणार आहे, या बैठकीला जाणे अत्यंत महत्वाचे असल्याने आदरणीय वहिनी आणि मला उपस्थित राहणे गरजेचे आहे. त्यामुळे वर्धापन दिवस 10 ऐवजी 11 तारखेला त्याच ठिकाणी होत आहे, अशी माहिती तटकरे यांनी दिली.

पुढे ते म्हणाले, “दादांच्या जाण्यानंतर आम्ही वर्धापनदिन दिवस साजरा करत आहोत. वहिणींनी धिराने हा सगळा कारभार पाहायला सुरूवात केली आहे. राष्ट्रीय अध्यक्ष आणि उपमुख्यमंत्री म्हणून वहिनींचे काम सुरू आहे. हा वर्धापन दिन ‘दादांना समर्पण, संघर्ष आणि संकल्प’ या विचाराने साजरा केला जाणार आहे.”  NCP Foundation Day

हेही वाचा : 

PMRDA housing lottery : प्रतीक्षा यादीतील नागरिकांना मोठी संधी! पीएमआरडीएच्या ४७२ सदनिका लाभार्थ्यांनी नाकारल्या