Maryam Nawaz: माजी पंतप्रधान नवाझ शरीफ यांची मुलगी मरियम नवाज या पाकिस्तानच्या पंजाब प्रांताच्या पहिल्या महिला मुख्यमंत्री बनणार आहेत. मरियम शुक्रवारी मुख्यमंत्रीपदाची शपथ घेतील. पाकिस्तानमध्ये 8 फेब्रुवारी रोजी निवडणुका झाल्या होत्या.

पंजाब प्रांताच्या गव्हर्नर हाऊसच्या प्रवक्त्याने गुरुवारी सांगितले, “राज्यपाल बलिघुर रहमान यांनी शुक्रवारी पंजाब विधानसभेचे अधिवेशन बोलावले आहे, ज्यामध्ये विधानसभेचे नवनिर्वाचित सदस्य शपथ घेतील आणि नवीन सरकारच्या स्थापनेला सुरुवात होईल.”

मरियम (वय 50) या पाकिस्तान मुस्लिम लीग-नवाज (PML-N) पक्षाच्या वरिष्ठ उपाध्यक्षाही आहेत. त्यांना पीएमएल-एन सुप्रीमो नवाझ शरीफ यांचे राजकीय उत्तराधिकारी मानले जाते.

नवाझ शरीफ यांनी अलीकडेच त्यांचे धाकटे भाऊ शेहबाज शरीफ यांना त्यांच्या पक्षाकडून पंतप्रधानपदाचे उमेदवार म्हणून नामांकित केले. पीएमएल-एनने 12 कोटींहून अधिक लोकसंख्या असलेल्या पंजाब प्रांतात पक्षाच्या मुख्यमंत्रिपदाच्या उमेदवार म्हणून मरियम यांचे नाव दिले आहे.