Nasarapur case : 1 मे महाराष्ट्र दिनाच्या दिवशी पुणे जिल्ह्यातील भोर तालुक्यातील नसरापूरमध्ये अत्यंत हृदयद्रावक घटना घडली. अवघ्या चार वर्षांच्या चिमुकलीवर एका 65 वर्षांच्या नराधमाने अत्याचार करून तिची निघृर्णपणे हत्या केली. या घटनेनंतर महाराष्ट्र हादरला असून, संतापाची लाट उसळली आहे. आता या घटनेची दखल राष्ट्रीय महिला आयोगाने घेतली असून, पोलिस प्रशासनाला महत्वाच्या सूचना दिल्या आहेत. राष्ट्रीय महिला आयोगाने या कृत्याचा तीव्र शब्दांत निषेध केला आहे. हे केवळ अमानवीय कृत्य नसून मुलांच्या हक्कांचे गंभीर उल्लंघन आहे, असे म्हटले आहे. आयोगाच्या अध्यक्षांनी राष्ट्रीय बाल हक्क संरक्षण आयोगाला या प्रकरणावर देखरेख ठेवण्याचे आदेश दिले आहेत. तसेच पीडित कुटुंबाला त्वरित आर्थिक मदत करा, जलदगती न्यायालयात खटला चालवा आणि वेळेत दोषारोपपत्र दाखल करा अशा सूचनाही दिल्या आहेत. या प्रकरणी महिला आयोगाने महिलांच्या सुरक्षेबाबत गंभीर चिंता व्यक्त केली आहे. आंदोलकांनी मुंबई-बंगळुरू राष्ट्रीय महामार्ग रोखून धरला भोर तालुक्यातील ही घटना वाऱ्यासारखी पसरली आणि पीडित बालिकेच्या नातेवाईकांनी आणि गावकऱ्यांमध्ये संतापाची लाट उसळली. या घटनेनंतर नसरापूर बंदची हाक देण्यात आली. आरोपीला फाशीची शिक्षा द्या अशी मागणी करण्यात आली. यानंतर पुण्यातील नवले पुलावर आंदोलन करण्यात आले. यावेळी तब्बल चार तास मुंबई-बंगळुरू राष्ट्रीय महामार्गावर वाहतूक कोंडी झाली होती. अखेर पोलिसांनी बळाचा वापर केल्यानंतर वाहतूक सुरळीत करण्यात आली. याप्रकरणी पोलीस अधीक्षक संदीप सिंग गिल यांनी दिलेल्या माहितीनुसार, आरोपीवर 1998 आणि 2015 मध्येही गुन्हे दाखल होते, मात्र त्यातून त्याची सुटका झाली होती. या प्रकरणात 15 दिवसांच्या आत दोषारोपपत्र दाखल करून खटला जलदगतीने चालवला जाईल, असे आश्वासन त्यांनी दिले आहे. मुख्यमंत्री देवेंद्र फडणवीस यांनी ही घटना अत्यंत लज्जास्पद आहे. आम्ही उच्च न्यायालयाला विशेष सरकारी वकील नेमण्याची विनंती करू. आरोपीला फाशीची शिक्षा मिळावी यासाठी सरकार सर्वतोपरी प्रयत्न करेल, असे आश्वासन दिले आहे. नेमकं काय घडलं? 1 मे महाराष्ट्र दिनाच्या दिवशी नसरापूरमध्ये नराधमाने चिमुरडीला जेवणाचे आमिष दाखवून एका गोठ्यात नेले. तिथे तिच्यावर अत्याचार केल्यानंतर पुरावा नष्ट करण्याच्या हेतूने तिची दगडाने ठेचून हत्या केली. यानंतर पोलिसांनी तपासाची चक्रे वेगाने फिरवली आणि परिसरातील सीसीटीव्हीच्या आधारे आरोपीला ताब्यात घेतले. आरोपी हा पेशाने मजूर असून तो गुन्हेगारी पार्श्वभूमीचा आहे. पुणे सत्र न्यायालयाने आरोपीला 7 मे पर्यंत पोलीस कोठडी सुनावली आहे. हेही वाचा : PMC News : स्थायी समितीत जोरदार राडा! वर्क ऑर्डरची घाई कुणासाठी? वृक्षगणनेच्या निविदेचा गुंता वाढला
