Nashik News : नाशिक पोलिसांनी (Nashik News) टीजेएसबी सहकारी बँकेची ३८ कोटी रुपयांची फसवणूक केल्याप्रकरणी सहा जणांविरुद्ध गुन्हा दाखल केला असून, या प्रकरणात बाफना ज्वेलर्सचे संचालक निलेश बाफना यांना अटक केली आहे.

पोलिसांच्या माहितीनुसार, बाफना यांनी १९९८ मध्ये टीजेएसबी बँकेकडून ९० लाख रुपयांची कॅश क्रेडिट सुविधा घेतली होती. त्यांनी कालांतराने ती परतफेड केली आणि बँकेच्या अधिकाऱ्यांचा विश्वास संपादन केला.

त्यानंतर त्यांनी वेळोवेळी अधिक कर्जाची (Nashik News) मागणी करत ही रक्कम ४४ कोटी रुपयांपर्यंत पोहोचली होती. मात्र, मार्च २०२५ पासून त्यांनी कर्जाचे व्याज नियमितपणे भरले नसल्याचा आरोप आहे.

बँकेने बाफना यांना नोटिसा बजावल्या, परंतु त्याचा काहीही उपयोग झाला नाही. बाफना यांचे खाते बुडीत कर्ज खाते म्हणून घोषित झाल्यानंतर बँकेने त्यांची मालमत्ता जप्त करण्याची प्रक्रिया सुरू केली. जिल्हा दंडाधिकाऱ्यांच्या १२ मे रोजीच्या आदेशानुसार, बँकेने ३ जून रोजी बाफना यांना त्यांच्या दुकानातील सर्व मालाचा ताबा घेण्यासाठी नोटीस बजावली. मात्र, बाफना यांनी दुकानाचा ताबा दिला नाही.

परिणामी, पोलिसांच्या मदतीने दुकानाचे शटर तोडण्यात आले आणि तिथे केवळ २५ लाख १९ हजार २५० रुपये किमतीचा माल आढळून आला. आरोपींनी ५९.०७ कोटी रुपयांच्या मालाचे खोटे स्टॉक स्टेटमेंट तयार केले होते आणि ती कागदपत्रे खरी असल्याचे भासवले होते, असे पोलिसांचे म्हणणे आहे. या कागदपत्रांच्या आधारे बँकेकडून विविध कर्ज सुविधा आणि कॅश क्रेडिट घेण्यात आले होते.

१९९८ पासूनच्या आरोपींच्या व्यवहारांची चौकशी करताना ही फसवणूक उघडकीस आली. एका बँक अधिकाऱ्याने केलेल्या तक्रारीनंतर सरकारवाडा पोलिसांनी रविवारी निलेश सुभाष बाफना, सुभाष लखीचंद बाफना, नम्रता निलेश बाफना, प्रभावती सुभाष बाफना, सरला पारसमल बाफना आणि जामीनदार कांतीलाल लखीचंद बाफना यांच्याविरुद्ध संबंधित कायदेशीर कलमांनुसार गुन्हा दाखल केला.

निलेश बाफना याला अटक करण्यात आली असून, त्याला २६ जूनपर्यंत पोलीस कोठडी सुनावण्यात आली आहे. पुढील तपासासाठी हा गुन्हा पोलिसांच्या आर्थिक गुन्हे शाखेकडे वर्ग करण्यात आला आहे.