न्यूयॉर्क : नासाच्या मार्स परसीव्हरन्स रोव्हरने अलीकडेच मंगळाच्या जेझेरो क्रेटरवर एक विचित्र झेब्रा रॉक शोधून काढला आहे. मंगळावर यापूर्वी पाहिल्या गेलेल्या खडकांपेक्षा हा खडक वेगळा आहे. त्यानंतर अमेरिकेच्या या अंतरिक्ष संस्थेने एका ब्लॉग पोस्टमध्ये लिहिले आहे की हे येणाऱ्या रोमांचक शोधांचे लक्षण असू शकते. रोव्हरने या महिन्याच्या सुरुवातीला काळ्या-पांढऱ्या पट्टेदार खडकाच्या प्रतिमा त्याच्या कॅमेऱ्यात कैद केल्या आहेत.

वेगळा दिसणारा हा खडक सुमारे 20 सेंटीमीटर आहे आणि काळ्या आणि पांढऱ्या पट्ट्यांसह आकर्षक दिसतो.तो कदाचित दुसऱ्या ठिकाणाहून आला असावा किंवा कदाचित वरच्या स्रोतावरून घरंगळत आला असेल असा कयास नासाने वर्तवला आहे.

परसीव्हरन्स रोव्हर फेब्रुवारी २०२१ मध्ये जेझेरो क्रेटरमध्ये पहिल्यांदा उतरले होते आणि मंगळाच्या प्राचीन इतिहासाची माहिती आणि इतर बाबींवर प्रकाश टाकू शकेल अशा खडकांचा शोध घेत आहे. हे सध्या जेझिरो क्रेटरच्या खडी उतारावर चढत आहे. अलिकडच्या दिवसांत रोव्हरने भूप्रदेशाच्या सपाट भागांचे पर्यटन केले आहे.