बारामती : बारामतीकरांच्या उत्सुकतेचा विषय ठरलेला पंतप्रधान नरेंद्र मोदी यांचा बारामती दौरा अखेर निश्चित झाल्याची माहिती पुढे आली आहे. पंतप्रधान मोदी २४ ऑक्टोबर रोजी बारामतीत येणार असून, विद्या प्रतिष्ठानच्या परिसरात उभारण्यात आलेल्या ‘प्रेरणास्थळा’चे उद्घाटन त्यांच्या हस्ते होणार आहे. तसेच विद्या प्रतिष्ठानमध्ये उभारण्यात आलेल्या कृत्रिम बुद्धिमत्ता (एआय) संस्थेची पाहणी करून या संस्थेच्या कामकाजाबाबत पंतप्रधानांसमोर सादरीकरण करण्यात येण्याची शक्यता आहे.
पंतप्रधानांच्या दौऱ्याच्या पार्श्वभूमीवर ज्येष्ठ नेते शरद पवार यांनी बुधवारी नक्षत्र गार्डन येथील ‘प्रेरणास्थळा’ची पाहणी केली.

त्यानंतर त्यांनी विद्या प्रतिष्ठानच्या मुख्यालयात पदाधिकारी व संबंधित अधिकाऱ्यांसोबत बैठक घेत दौऱ्याच्या तयारीचा आढावा घेतला. या बैठकीस युवा नेते युगेंद्र पवार, विद्या प्रतिष्ठानचे विश्वस्त विठ्ठल मणियार, प्रताप पवार, कृषी विकास प्रतिष्ठानचे मुख्य कार्यकारी अधिकारी प्रा. निलेश नलवडे, विश्वस्त किरण गुजर, सचिव नीलिमा गुजर आदी उपस्थित होते.

‘प्रेरणास्थळा’तून शांतता, समतेचा संदेश

विद्या प्रतिष्ठान परिसरात उभारण्यात आलेले ‘प्रेरणास्थळ’ तथागत भगवान गौतम बुद्ध यांच्या स्मृती व विचारांना समर्पित करण्यात आले आहे. शांतता, समता आणि मानवतेचा संदेश नागरिकांपर्यंत पोहोचविण्याचा उद्देश या संकल्पनेमागे आहे. येथे भगवान गौतम बुद्ध यांचा पुतळा तसेच विविध महापुरुषांच्या चित्रांच्या माध्यमातून त्यांच्या कार्याचा आणि विचारांचा परिचय करून देण्यात आला आहे.

एआय रोबोटने केले शरद पवारांचे स्वागत

दरम्यान, विद्या प्रतिष्ठानच्या मुख्यालयात बैठकीसाठी पोहोचलेल्या शरद पवार यांचे एआय रोबोटने अनोख्या पद्धतीने स्वागत केले. पवार मुख्य इमारतीत पोहोचताच रोबोटने त्यांच्याकडे पाहून हात उंचावला. त्यावेळी पवार यांनी रोबोटकडे पाहून ‘चला’ असे म्हटले. त्यानंतर रोबोट बाजूला झाला. या अनोख्या स्वागताची उपस्थितांमध्ये चर्चा रंगली. पंतप्रधान मोदींच्या दौऱ्यामुळे बारामतीतील विद्या प्रतिष्ठान परिसरात तयारीला वेग आला असून, दौऱ्याच्या नियोजनाकडे बारामतीकरांचे लक्ष लागले आहे.