Narendra Modi : नक्षलवादी हिंसाचाराचा सर्वाधिक फटका आदिवासी समाजाला बसला असून, माओवादी प्रभावित भागांत त्यांना मतदानाच्या अधिकारापासूनही वंचित ठेवण्यात आले होते. मागील सरकारने आदिवासी बांधवांना त्यांच्या नशिबावर सोडून दिले होते, असेही पंतप्रधान नरेंद्र मोदी यांनी (Narendra Modi) रविवारी सांगितले.

आदिवासी स्वातंत्र्यसैनिक बिरसा मुंडा यांच्या १५१ व्या जयंतीनिमित्त आयोजित जनजातीय गौरव दिवस कार्यक्रमाला दूरदृश्य प्रणालीद्वारे (व्हर्च्युअली) त्‍यांनी संबोधित केले. नरेंद्र मोदी (Narendra Modi) म्हणाले, जेव्हा माओवादी बळजबरीने मुलांचे अपहरण करत होते किंवा आदिवासी तरुणींना उचलून नेत होते, तेव्हा मागील सरकारे मूक प्रेक्षक बनून राहिली होती.

नक्षलवाद्यांनी आदिवासी समाजाला मतदानाच्या अधिकारापासून वंचित ठेवले, परंतु मागील सरकारे केवळ बघत राहिली. मात्र, आता माओवादी हिंसाचार नष्ट झाल्यामुळे परिस्थिती बदलली आहे. आदिवासी माता-भगिनी आता सुरक्षित अनुभवत असून त्या सरकारला आशीर्वाद देत आहेत. ज्या मुलांचे बालपण हिंसाचारामुळे प्रभावित झाले होते, त्यांना आता शिक्षण आणि रोजगाराच्या संधी मिळत आहेत, असेही त्यांनी नमूद केले.

मूलभूत सुविधांपासून वंचित राहिलेल्या आदिवासी भागांत विकासाला गती देण्यासाठी केंद्र सरकारने पीएम-जनमन योजना आणि धरती आबा जनजातीय ग्राम उत्कर्ष अभियान यासाठी १ लाख कोटी रुपयांहून अधिक निधीची तरतूद केली आहे. सरकारने वंचित घटकांना प्राधान्य दिले आहे.

गरिबांसाठी चार कोटींहून अधिक पक्की घरे बांधली आहेत, स्वातंत्र्यानंतर अनेक दशके वीज नसलेल्या १८,००० गावांपर्यंत वीज पोहोचवली आहे. देशभरात १.७५ लाखांहून अधिक ‘आयुष्मान आरोग्य मंदिरे’ स्थापन करण्यात आली असून, त्याद्वारे दुर्गम आदिवासी भागांपर्यंत आरोग्य सेवा पोहोचवण्यात आल्या आहेत, असे त्यांनी सांगितले.

3 हजार कोटींच्या विकासकामांचे लोकार्पण
जनजातीय गौरव दिनाचे औचित्य साधून देशभरात आदिवासी विकासाशी संबंधित 246 प्रकल्पांचे लोकार्पण आणि भूमिपूजन करण्यात आले. या प्रकल्पांची एकूण किंमत सुमारे 3 हजार कोटी रुपये आहे. यामध्ये 170 हून अधिक प्रकल्पांचे लोकार्पण, तर 70 हून अधिक प्रकल्पांचे भूमिपूजन करण्यात आले.

यामध्ये आदिवासी विद्यार्थ्यांसाठी एकलव्य मॉडेल निवासी शाळा, पीएम जनमन योजनेंतर्गत बहुउद्देशीय केंद्रे, आरोग्य सुविधा, आदिवासी उत्पादनांच्या विक्रीसाठी विपणन केंद्रे आणि ग्रामीण भागातील पायाभूत सुविधांचा (Narendra Modi)  समावेश आहे.