PM Modi : भारताचे पंतप्रधान नरेंद्र मोदी यांचे आफ्रिकन-अमेरिकन हॉलिवूड अभिनेत्री आणि गायिका मेरी मिलबेन हिने कौतुक केले आहे. ‘पंतप्रधान नरेंद्र मोदी हे भारत आणि अमेरिका संबंधांसाठी सर्वोत्तम नेते आहेत. अमेरिकेतील अनेकांना पंतप्रधानांनी पुन्हा निवडणूक जिंकावी, असे वाटते. जेणेकरून दोन्ही देशांमधील संबंध आणखी घट्ट होऊ शकतील,’ असे मेरी मिलबेनने म्हटले आहे.

पीटीआय या वृत्तसंस्थेला दिलेल्या मुलाखतीत मेरी मिलबेन म्हणाली, ‘मी तुम्हाला सांगू इच्छितो की अमेरिकेत पंतप्रधानांना नक्कीच खूप पाठिंबा आहे. माझा विश्वास आहे की अनेकांना पंतप्रधान पुन्हा निवडून आलेले पाहायचे आहेत कारण ते भारतासाठी सर्वोत्तम नेते आहेत. मला विश्वास आहे की हा निवडणूक काळ अमेरिका, भारत आणि जगासाठी सर्वात महत्त्वाचा निवडणूक काळ असणार आहे. त्यामुळे नागरिक म्हणून आपल्या सर्वांवर मोठी जबाबदारी आहे आणि ती आपल्याला पार पाडायची आहे.

पुढे ती म्हणाली, ‘हे गुपित नाही, संपूर्ण भारताला माहित आहे की मी पंतप्रधान मोदींचा मोठा समर्थक आहे आणि मला वाटते की ते भारतासाठी सर्वोत्तम नेते आहेत. भारत-अमेरिका संबंधांसाठी ते एक चांगले नेते आहेत. ही ती वेळ आहे जेव्हा नागरिकांनी आवाज उठवण्याची, त्या गोष्टी शेअर करण्याची, त्या धोरणांची जी आपल्या देशांसाठी आणि नक्कीच आपल्या नेत्यांसाठी महत्त्वाची आहे. आपल्या देशात बदल घडवून आणण्याची ताकद आपल्यात आहे.’

यावेळी मिलबेन यांनी भारतीयांना मतदान करण्याचे आवाहनही केले आहे. ती म्हणाली, ‘मी भारतातील माझ्या सर्व प्रिय कुटुंबाला या निवडणुकीच्या काळात मतदान करण्यासाठी प्रोत्साहित करते, जेणेकरून तुमचा आवाज ऐकू येईल.’

भारतातही मेरी मिलबेनचा मोठा चाहता वर्ग 

दरम्यान, देशात यंदा लोकसभा निवडणुका होणार आहेत. त्यादृष्टीने सर्व पक्ष तयारी करत आहे. दुसरीकडे अमेरिकेतही याच वर्षी नोव्हेंबरमध्ये राष्ट्राध्यक्षपदाच्या निवडणुका होणार आहेत  गेल्या वर्षी जूनमध्ये पंतप्रधान नरेंद्र मोदी अमेरिकेच्या दौऱ्यावर गेले होते, तेव्हा मेरी मिलबेनने एका कार्यक्रमात भारताचे राष्ट्रगीत ‘जन गण मन’ आणि ‘ओम जय जगदीश हरे’ हे हिंदू गाणे गायले होते. त्यानंतर तिचा भारतात मोठे चाहता वर्ग झाला.