Narendra Modi : पंतप्रधान नरेंद्र मोदी (Narendra Modi) यांनी मंगळवारी इंधन पेचाच्या पार्श्वभूमीवर उच्चस्तरीय बैठक घेतली. त्यांनी भारतीय ग्राहकांना त्रास न होण्याची निश्चिती करण्याच्या सूचना दिल्या. तसेच, केंद्रीय मंत्र्यांना समन्वयाने, एकत्रितपणे कार्य करण्यास सांगितले. पश्चिम आशियातील संघर्ष चिघळल्यामुळे आंतरराष्ट्रीय बाजारातील कच्च्या तेलाच्या किमती भडकल्या आहेत. त्या घडामोडींचा परिणाम होऊन भारतात गॅससह पेट्रोलियम उत्पादनांचा तुटवडा जाणवण्याची चिन्हे आहेत. ती बाब विचारात घेऊन सरकारच्या पातळीवर हालचाली सुरू झाल्या आहेत. मोदींनीही पुढे सरसावत महत्वाची बैठक घेतली. त्यामध्ये परराष्ट्र मंत्री एस.जयशंकर, पेट्रोलियम मंत्री हरदीपसिंग पुरी, अर्थमंत्री निर्मला सीतारामन आणि वाणिज्य मंत्री पियूष गोयल सहभागी झाले. बैठकीत देशातील ऊर्जा, इंधनविषयक स्थितीचा आढावा घेण्यात आला. गॅस, पेट्रोलियम उत्पादनांची टंचाई जाणवणार नाही या उद्देशातून उपाययोजना करण्याच्या सूचना मोदींनी बैठकीत दिल्या. भारत संघर्षग्रस्त पश्चिम आशियातून मोठ्या प्रमाणात गॅस, पेट्रोलियम उत्पादने आयात करतो. मात्र, सध्याच्या स्थितीचा विचार करून भारताने इतर पर्यायांचा अवलंब केला आहे. त्यातून अमेरिका, रशिया, व्हेनेझुएला, ऑस्ट्रेलिया आणि इतर देशांमधून खरेदीचे सत्र सुरू करण्यात आले असल्याची माहिती सुत्रांनी दिली. घरगुती वापरासाठीच्या आणि वाहतूक क्षेत्रासाठीच्या गॅस पुरवठ्यात खंड पडू नये यासाठी सरकारने महत्वाची कृती केली. त्यातून नैसर्गिक वायू पुरवठा धोरणाची फेररचना करण्यात आली. त्यानुसार, इतर क्षेत्रांपेक्षा एलपीजी उत्पादन, सीएनजी आणि पाईप्ड कुकिंग गॅसला सर्वोच्च प्राधान्य देण्यात येईल.
