Narendra Modi : पंतप्रधान नरेंद्र मोदी (Narendra Modi) यांनी शर्टलेस निदर्शने आणि गॅस सिलिंडर गदारोळावरून कॉंग्रेसवर पुन्हा जोरदार टीकास्त्र सोडले. कॉंग्रेसला जबाबदार पक्षाची भूमिका निभावण्यात अपयश आले आहे. तो पक्ष देशात घबराट निर्माण करण्याचा प्रयत्न करत आहे, असा शाब्दिक हल्लाबोल त्यांनी केला. पश्चिम आशियातील युद्धामुळे भारतात गॅस सिलिंडरचा तुटवडा जाणवत असल्याचे चित्र पुढे आले आहे. मात्र, केंद्र सरकारकडून कुठलाही इंधन तुटवडा नसल्याची ग्वाही दिली जात आहे. कॉंग्रेस आणि इतर विरोधी पक्ष गॅस सिलिंडरवरून घबराट पसरवण्यासाठी प्रयत्नशील आहेत, असा आरोप सरकारचे नेतृत्व करणाऱ्या भाजपकडून केला जात आहे. तो धागा पकडून मोदी यांनी शनिवारी आसाममधील सभेत कॉंग्रेसवर निशाणा साधला. narendra modi सध्या संपूर्ण जगाला युद्धजन्य स्थितीला सामोरे जावे लागत आहे. त्या स्थितीचा आपल्या देशातील नागरिकांवरील परिणाम कमीत कमी असावा या उद्देशातून आमचे सरकार कार्यरत आहे. अशावेळी कॉंग्रेसने जबाबदार पक्षाची भूमिका निभावणे अपेक्षित होते, असा शाब्दिक चिमटा त्यांनी काढला. मागील महिन्यात दिल्लीत एआय इम्पॅक्ट शिखर परिषद संपन्न झाली. त्या परिषदस्थळी युवक कॉंग्रेसच्या काही कार्यकर्त्यांनी शर्टलेस निदर्शने केली. त्या घडामोडींचा संदर्भ देऊन मोदी म्हणाले, संपूर्ण जग कृत्रिम बुद्धिमत्ता (एआय) या विषयात रस घेत आहे. दिल्लीतील यशस्वी परिषदेत जागतिक नेते, तंत्रज्ञ सहभागी झाले. मात्र, कॉंग्रेसने कपडे फाडण्याचे प्रदर्शन घडवून देशाच्या बदनामीचा प्रयत्न केला. देशहिताच्या विरोधातील कृत्ये करण्यात कॉंग्रेस व्यस्त आहे. असा पक्ष कुठल्या राज्याचेही भले करू शकत नाही.
