Narayangaon News : हिवरे तर्फे नारायणगाव परिसरातील (Narayangaon News) टोमॅटो उत्पादक शेतकऱ्यांना यंदा घवघवीत बाजारभाव मिळाल्याने आर्थिक सुबत्ता आली आहे. अनुकूल हवामान, योग्य नियोजन, दर्जेदार रोपे आणि आधुनिक शेती पद्धतीमुळे अनेक शेतकऱ्यांनी लाखोंची उलाढाल केली असून त्यामध्ये शेतकरी अविनाश अनंत भोर यांनी विशेष कामगिरी करत टोमॅटो उत्पादनात नवा आदर्श निर्माण केला आहे.

अविनाश भोर (Narayangaon News) यांनी १७ मार्च २०२६ रोजी सात एकर क्षेत्रात अथर्व जातीच्या टोमॅटोची लागवड केली. दोन रोपांमध्ये ४.५ फूट आणि दोन सरींमध्ये १.२५ फूट अंतर ठेवून लागवड करण्यात आली. सुमारे ५० हजार रोपे प्रतिरोप १.६० रुपये दराने खरेदी करण्यात आली असून त्यासाठी सुमारे ८० हजार रुपयांचा खर्च झाला.

लागवडीनंतर शेणखत, कोंबडी खत आणि विद्राव्य खतांचा संतुलित वापर करण्यात आला. प्रत्यक्ष लागवडीपासून तोडणीपर्यंत दररोज सुमारे २० मजूर कार्यरत होते. २० मे पासून टोमॅटो तोडणीला सुरुवात झाली. त्यानंतर दररोज सुमारे ४० मजूर तोडणी व वर्गीकरणाच्या कामात गुंतले होते.

अविनाश भोर यांनी ५ जुलैपर्यंत जुन्नर कृषी उत्पन्न बाजार समितीच्या नारायणगाव (Narayangaon News) उपबाजारात १३ हजार ५०० क्रेट टोमॅटोची विक्री केली. एका क्रेटला सरासरी ५०० ते ९०० रुपये दर मिळाल्याने सात एकर क्षेत्रातून तब्बल ७२ लाख रुपयांची उलाढाल झाली. अथर्व जातीच्या टोमॅटोचे एकरी सुमारे दोन हजार क्रेट उत्पादन मिळाले.

लागवड, खते, औषधे आणि मजुरी यासाठी एकरी सुमारे २ लाख ५० हजार रुपये, तर सात एकरांसाठी एकूण १७ लाख ५० हजार रुपये खर्च झाला. खर्च वजा जाता त्यांना ५४ लाख ५० हजार रुपयांचा निव्वळ नफा मिळाल्याने त्यांच्या कुटुंबात आनंदाचे वातावरण आहे. मात्र हंगामाच्या शेवटच्या टप्प्यात झालेल्या अतिवृष्टीमुळे दोन ते तीन हजार क्रेट टोमॅटोचे नुकसान झाल्याचे त्यांनी सांगितले.

कृषी उत्पन्न बाजार समितीच्या नारायणगाव उपबाजारात हिवरे तर्फे नारायणगाव परिसरातील टोमॅटोची गुणवत्ता उत्कृष्ट असल्याने व्यापाऱ्यांकडून मोठ्या प्रमाणावर मागणी होती. भोर ॲग्री मार्टचे अविनाश भोर यांच्या मार्गदर्शनाखाली परिसरातील शेतकऱ्यांनी सुमारे १४५ एकर क्षेत्रात टोमॅटोची लागवड केली असून त्यांनाही यंदा चांगला बाजारभाव मिळाल्याने समाधान व्यक्त केले जात आहे.