Namal Rajapaksa : श्रीलंकेचे माजी अध्यक्ष महिंदा राजपक्षे यांचे थोरले पुत्र नमल राजपक्षे (Namal Rajapaksa) यांना आज भ्रष्टाचाराच्या एका प्रकरणात अटक करण्यात आली. श्रीलंकन एअरलाईन्साठी एअरबस कंपनीचे विमान खरेदीप्रकरणातील भ्रष्टाचारामध्ये सहभागी असल्याचा आरोप त्यांच्यावर आहे.

राजपक्षे यांना (Namal Rajapaksa) भ्रष्टाचार नियंत्रक आयोगापुढे काल हजर होण्यास सांगण्यात आले होते. यावेळी तब्बल पाच तास चौकशी केल्यानंतर त्यांना अटक करण्यात आली. न्यायालयासमोर हजर केल्यानंतर न्यायालयाने त्यांना १८ सप्टेंबरपर्यंतची कोठडी सुनावली आहे, असे अधिकाऱ्यांनी सांगितले. नमल राजपक्षे हे श्रीलंका पोदुजान पेरामुना पक्षाचे नेते आहेत.

महिंदा राजपक्षे देशाचे अध्यक्ष असताना झालेल्या विमान खरेदी प्रकरणातून त्यांना ६ लाख डॉलरचा फायदा मिळाला असल्याची माहिती मिळाली होती. दलालीचे हे पैसे वेगवेगळ्या बँक खात्यांमध्ये जमा करण्यात आले असल्याचे बोलले जाते आहे.

नमल राजपक्षे (Namal Rajapaksa) यांचे चुलत भाऊ शशिंद्र राजपक्षे हे देखील सध्या तुरुंगात आहेत. नमल राजपक्षे यांनी सरकारविरोधात अनुराधापुरा येथे १२ सप्टेंबरला विराट मोर्चा काढणार असल्याचे जाहीर केले होते. सरकारविरोधी आंदोलनाच्या हालचाली दडपण्यासाठीच नमल यांना अटक झाल्याचा आरोप एसएलपीपी पक्षाने केला आहे.