Khashaba Movie : प्रसिद्ध दिग्दर्शक नागराज मंजुळे यांच्या बहुप्रतीक्षित ‘खाशाबा’ चित्रपटाचा टीझर प्रदर्शित होताच नव्या वादाला तोंड फुटले आहे. लेखक संजय दुधाणे यांनी चित्रपटाच्या टीझरमधील काही दृश्ये त्यांच्या ‘ऑलिम्पिकवीर खाशाबा जाधव’ या पुस्तकातील कथनाशी मिळती-जुळती असल्याचा दावा करत कॉपीराइट उल्लंघनाचा आरोप केला आहे. हे प्रकरण सध्या न्यायप्रविष्ट असून पुणे दिवाणी न्यायालयाने या प्रकरणाची पुढील सुनावणी 10 जुलै रोजी निश्चित केली आहे.

नेमका वाद काय?

लेखक संजय दुधाणे यांच्या म्हणण्यानुसार, त्यांनी लिहिलेल्या ‘ऑलिम्पिकवीर खाशाबा जाधव’ या पुस्तकातील काही महत्त्वाच्या प्रसंगांचा चित्रपटात आणि विशेषतः टीझरमध्ये परवानगी न घेता वापर करण्यात आला आहे. त्यांच्या मते, या दृश्यांचे सादरीकरण हे केवळ ऐतिहासिक घटनांचे सामान्य चित्रण नसून त्यांच्या पुस्तकातील नाट्यमय मांडणीशी साधर्म्य दर्शवते.

या पार्श्वभूमीवर दुधाणे यांनी 10 ऑक्टोबर 2024 रोजी नागराज मंजुळे, निर्मात्या ज्योती देशपांडे, Jio Studios आणि Aatpat Productions यांच्याविरोधात कॉपीराइट उल्लंघनाचा दावा दाखल केला होता.

न्यायालयात काय घडले?

हे प्रकरण न्यायालयात प्रलंबित असतानाच 1 मे 2026 रोजी ‘खाशाबा’ चित्रपटाचा टीझर चित्रपटगृहांमध्ये प्रदर्शित करण्यात आला. यानंतर न्यायालयाने संबंधित पक्षांना नोटीस बजावली आहे.

दुधाणे यांच्यावतीने ॲड. सुवर्णा शिंदे यांनी न्यायालयात अर्ज दाखल करून, चित्रपट प्रदर्शित होण्यापूर्वी न्यायालयाने नियुक्त केलेल्या आयोगामार्फत चित्रपटाची पाहणी करण्यात यावी तसेच ‘ऑलिम्पिकवीर खाशाबा जाधव’ या पुस्तकाची तुलना करूनच पुढील निर्णय घ्यावा, अशी मागणी केली आहे. या प्रकरणात लेखक संजय दुधाणे यांच्या बाजूने एकूण 19 पुरावे न्यायालयात सादर करण्यात आल्याचा दावा करण्यात आला आहे.

त्यामध्ये, चित्रपटाच्या टीझरमधील 5 दृश्यांशी संबंधित पुरावे असून नागराज मंजुळे यांनी दाखल केलेल्या 5 कोटी रुपयांच्या अब्रुनुकसानीच्या दाव्यातील 4 संदर्भ रणजीत जाधव यांच्याशी झालेल्या करारासंदर्भातील 6 कागदपत्रे तसेच इतर पूरक दस्तऐवजांचा समावेश असल्याचे सांगण्यात आले आहे. हे सर्व पुरावे ॲड. सुवर्णा शिंदे यांनी न्यायालयात सादर केल्याचे दुधाणे यांनी म्हटले आहे.

अब्रुनुकसानीच्या दाव्यावरही नवा दावा :

दरम्यान, नागराज मंजुळे यांनी संजय दुधाणे यांच्याविरोधात 5 कोटी रुपयांचा अब्रुनुकसानीचा दावा दाखल केला होता. मात्र, या दाव्यात सादर करण्यात आलेल्या शपथपत्रात जोडलेले काही संदर्भ हे प्रत्यक्षात दुधाणे यांच्या पुस्तकावर आधारित असल्याचा दावा स्वतः दुधाणे यांनी केला आहे.

त्यांच्या म्हणण्यानुसार, मंजुळे यांनी चित्रपटाची कथा सोशल मीडियावरील आणि सार्वजनिक उपलब्ध माहितीतून विकसित केल्याचे शपथपत्रात नमूद केले असले, तरी त्यामध्ये जोडलेले चार संदर्भ त्यांच्या पुस्तकाशी संबंधित असल्याचे दिसून येते.

टीझरमधील कोणत्या दृश्यांवर आक्षेप?

महाराष्ट्राचे तत्कालीन मुख्यमंत्री यांच्याशी संबंधित प्रसंग

खाशाबा जाधव यांच्या महाविद्यालयीन प्राचार्यांचे चित्रण

इंग्रज अधिकाऱ्यांशी संबंधित प्रसंग

बडोद्याचे माणिकराव यांचा संदर्भ

पंजाबी मल्लांवर झालेल्या कथित अन्यायाचे चित्रण

कुस्तीसोबतच मल्लखांब आणि खो-खोमधील खाशाबा यांच्या अष्टपैलू व्यक्तिमत्त्वाचे दर्शन

हे सर्व प्रसंग आपण आपल्या पुस्तकात संशोधन करून आणि नाट्यमय पद्धतीने मांडले असल्याने, चित्रपटातील त्याच धाटणीची दृश्ये हा केवळ योगायोग असू शकत नाही, असा दावा त्यांनी केला आहे.

सध्या हे संपूर्ण प्रकरण न्यायप्रविष्ट असल्याने दोन्ही बाजूंकडून गंभीर दावे आणि प्रतिदावे करण्यात येत आहेत. चित्रपट निर्मात्यांची भूमिका आणि लेखकांचे आरोप यांची सत्यता न्यायालयीन प्रक्रियेनंतरच स्पष्ट होणार आहे. त्यामुळे या वादाचा अंतिम निकाल न्यायालयाच्या निर्णयानंतरच समोर येईल. तोपर्यंत या प्रकरणातील सर्व आरोप आणि दावे न्यायालयीन परीक्षणाच्या अधीन आहेत.