Nagpur HSC Paper Leak : बारावी (HSC) परीक्षेतील पेपर फुटल्याच्या धक्कादायक प्रकारामुळे शहरातील शैक्षणिक क्षेत्रात मोठी खळबळ उडाली आहे. विज्ञान शाखेतील केमिस्ट्री आणि फिजिक्स या विषयांचे पेपर परीक्षेपूर्वीच व्हॉट्सअॅपवर प्रसारित झाल्याचे उघड झाले असून या प्रकरणी सदर पोलीस ठाण्यात गुन्हा दाखल करण्यात आला आहे. व्हॉट्सअॅप ग्रुपवर पेपर अपलोड मिळालेल्या माहितीनुसार, ‘XII’ नावाच्या व्हॉट्सअॅप ग्रुपवर सकाळी 10.37 वाजता केमिस्ट्रीचा पेपर अपलोड करण्यात आला होता. परीक्षा सुरू होण्याच्या सुमारे तासभर आधीच पेपर फिरत असल्याचे प्राथमिक तपासात समोर आले आहे. या ग्रुपमध्ये एकूण 21 विद्यार्थी सदस्य असल्याची माहिती आहे. स्वच्छतागृहात मोबाईल वापराचा संशय परीक्षा सुरू असताना एक विद्यार्थिनी दुपारी 12 वाजता स्वच्छतागृहात गेली होती. ती परत येण्यासाठी 15 मिनिटांपेक्षा अधिक वेळ लागल्याने पर्यवेक्षकांना संशय आला. चौकशीत तिच्याकडून मोबाईल जप्त करण्यात आला. मोबाईल तपासल्यानंतर फिजिक्स आणि केमिस्ट्रीचे पेपर परीक्षेपूर्वीच व्हॉट्सअॅपवर शेअर झाल्याचे स्पष्ट झाले. यानंतर संबंधित विद्यार्थिनीने दुसऱ्या विद्यार्थिनीचे नाव सांगितले. तिच्या बॅगेतूनही मोबाईल जप्त करण्यात आला असून ती देखील त्याच ‘XII’ ग्रुपची सदस्य असल्याचे उघड झाले. खासगी शिकवणी शिक्षकावर आरोप प्राथमिक चौकशीत दोन्ही विद्यार्थिनींनी खासगी शिकवणी वर्गातील एका शिक्षकाने पैसे घेऊन पेपर फुटवल्याचा आरोप केला आहे. मात्र या आरोपांची अधिकृत पुष्टी झालेली नसून आर्थिक व्यवहार झाले का, याचा तपास सुरू असल्याची माहिती महाराष्ट्र राज्य माध्यमिक व उच्च माध्यमिक शिक्षण मंडळ, नागपूर विभागाचे अध्यक्ष डॉ. शिवलिंग पटवे यांनी दिली. सर्व सदस्यांची चौकशी ‘XII’ व्हॉट्सअॅप ग्रुपमधील इतर विद्यार्थी शहरातील विविध परीक्षा केंद्रांवर परीक्षा देत असल्याचे समोर आले आहे. सर्व सदस्यांची चौकशी केली जाणार असून शहरात अशा आणखी किती ग्रुप कार्यरत होते, याचाही तपास सुरू आहे. प्रशासनाची तातडीची कारवाई या घटनेनंतर संबंधित परीक्षा केंद्रावरील सर्व शिक्षक आणि कर्मचाऱ्यांची बदली करण्यात आली आहे. केंद्रप्रमुखांनी पोलिसांत तक्रार दाखल केल्यानंतर गुन्हा नोंदवण्यात आला. दरम्यान, शालेय शिक्षण राज्यमंत्री पंकज भोयर यांनी संपूर्ण प्रकरणाची सखोल चौकशी करण्याचे आदेश दिले आहेत.
