राजूर :  महाराष्ट्र राज्यामध्ये आमदार, मंत्री म्हणून ज्या ज्या क्षेत्रांमध्ये माजीमंत्री स्व.मधुकर पिचड यांचे काम आहे ते निश्चितच आदर्श होते. त्यांच्या आठवणी आजही आमच्या डोळ्यासमोर दिसतात. निळवंडे धरणाचे शिल्पकार म्हणून त्यांचा उल्लेख केला पाहिजे. त्यांचे चिरंजीव वैभव पिचड यांना इथून पुढच्या काळामध्ये जे काही सहकार्य लागेल ते निश्चितपणाने केले जाईल. स्व.पिचडांचे जे अपूर्ण कार्य राहिलेले आहे, ते पूर्ण करण्यासाठी निश्चित मदत करू, अशी ग्वाही मंत्री नरहरी झिरवाळ यांनी दिली.

राजूर येथे पिचड कुटुंबीयांचे सांत्वन करण्यासाठी आले असता त्यांनी जुन्या आठवणींना उजाळा दिला. साहेबांची विशेष करून सहकार क्षेत्र व प्रशासनमध्ये मोठी पक्कड होती. आदिवासी भागामध्ये काम पाहिल्यानंतर खऱ्या अर्थाने शिल्पकार म्हणून त्यांचा उल्लेख केला पाहिजे. भविष्यात वैभवराव यांना निश्चितपणाने सहकार्य केले जाईल. माजीमंत्री पिचड यांचे जे अपूर्ण कार्य राहिलेले ते पूर्ण करण्यासाठी सर्वांनी पिचड कुटुंबाच्या पाठीमागे राहू, अशी भावना त्यांनी व्यक्त केली.

माजी आमदार वैभवराव पिचड हे काशी येथे स्व.पिचड यांच्या अस्थी टाकण्यात गेले असता त्यांची भेट होऊ शकली नाही परंतु माजी सरपंच हेमलता पिचड यांची भेट घेऊन सांत्वन केले. यावेळी उपसरपंच संतोष बनसोडे ,गोकुळ कानकाटे, सी.बी. भांगरे, अनंत घाणे , पांडुरंग खाडे, नीलेश साकोरे, गंगाराम धिदळे आदींसह मोठ्या संख्येने कार्यकर्ते उपस्थित होते.