PM Modi Mumbai : पंतप्रधान नरेंद्र मोदी यांच्या मुंबईतील कार्यक्रमाच्या पार्श्वभूमीवर सुरक्षा यंत्रणांनी दोन जणांना ताब्यात घेतले आहे. त्यापैकी एका व्यक्तीकडे बंदूक आढळल्याने सुरक्षा यंत्रणांमध्ये खळबळ उडाली. ताब्यात घेतलेल्या व्यक्तीने स्वतःला पंतप्रधान कार्यालयाचा (PMO) अधिकारी असल्याचे सांगितल्याची माहिती आहे.

PMOचे बनावट ओळखपत्र –  (PM Modi Mumbai )

ताब्यात घेतलेल्या तरुणाचे नाव रोहन पारेख असून त्याचे वय 24 वर्षे असल्याचे सांगण्यात येत आहे. सुरक्षा तपासणीदरम्यान त्याच्याकडे PMO अधिकाऱ्याचे बनावट ओळखपत्र आढळले. चौकशी केली असता हे ओळखपत्र बनावट असल्याचे समोर आले.

रोहनसोबत एक बॉडीगार्डही होता. त्याच्याकडे बंदूक आढळल्याची माहिती आहे. या प्रकरणाचा पुढील तपास मुंबई क्राइम ब्रांचकडून सुरू आहे.

मुंबईत पंतप्रधान मोदींचा कार्यक्रम  (PM Modi Mumbai )

पंतप्रधान नरेंद्र मोदी मंगळवारी (8 सप्टेंबर 2026) सायंकाळी सुमारे 5.45 वाजता मुंबईतील नीता मुकेश अंबानी कल्चरल सेंटरमध्ये ग्लोबल फिनटेक फेस्ट (GFF) 2026 च्या सातव्या आवृत्तीचे उद्घाटन करणार आहेत.

GFF हे फिनटेक क्षेत्रातील प्रमुख आंतरराष्ट्रीय संमेलन मानले जाते. या परिषदेत धोरणकर्ते, नियामक संस्था, केंद्रीय बँका, वित्तीय संस्था, फिनटेक आणि तंत्रज्ञान कंपन्या, गुंतवणूकदार तसेच शिक्षण क्षेत्रातील तज्ज्ञ सहभागी होतात.

डिजिटल वित्तीय क्षेत्रावर चर्चा –  (PM Modi Mumbai)

GFF 2026 मध्ये डिजिटल पेमेंट आणि वित्तीय समावेशनाच्या क्षेत्रातील भारताची भूमिका पुढे नेण्यावर भर दिला जाणार आहे. एजंटिक एआय, प्रोग्रामेबल वित्तीय साधने आणि क्वांटम तंत्रज्ञानासारख्या नव्या तंत्रज्ञानाचा नागरिक, उद्योग आणि अर्थव्यवस्थांसाठी सुरक्षित व सर्वसमावेशक वापर कसा करता येईल, यावर परिषदेत चर्चा होणार आहे.

यापूर्वी पंतप्रधान मोदी गुजरातमधील वडोदरा येथे कार्यक्रमाला उपस्थित राहिले. येथे त्यांनी वेस्टर्न डेडिकेटेड फ्रेट कॉरिडॉरच्या (WDFC) तीन महत्त्वपूर्ण विभागांचे राष्ट्रार्पण केले. या 326 किलोमीटरच्या प्रकल्पावर 20,700 कोटी रुपयांहून अधिक खर्च करण्यात आला आहे.