Maharashtra Weather Update : महाराष्ट्रातील कोकण पट्ट्यात उष्णतेचा तीव्र फटका जाणवू लागला आहे. हवामान विभागाने मुंबई, ठाणे, पालघर, रायगड आणि रत्नागिरी या भागांसाठी उष्णतेच्या लाटेचा इशारा दिला आहे. ९ मार्च ते ११ मार्चदरम्यान या भागात तापमानात मोठी वाढ होण्याची शक्यता व्यक्त करण्यात आली आहे.

हवामान विभागाच्या अंदाजानुसार काही भागांमध्ये तापमान ३८ अंश सेल्सिअसपेक्षा अधिक नोंदवले गेले असून ठाण्यात तर तापमान चाळीशीच्या पुढे गेले आहे. काही स्थानिक हवामान केंद्रांमध्ये ४२.५ अंश सेल्सिअसपर्यंत उच्चांक नोंदवला गेला आहे. कोरडे पूर्वेकडील वारे आणि समुद्राकडून येणारे थंड वारे कमकुवत झाल्यामुळे उष्णतेची लाट निर्माण झाल्याचे तज्ज्ञांचे मत आहे.

सोमवारी कुलाबा आणि सांताक्रूझ येथील वेधशाळांमध्ये किमान तापमान अनुक्रमे २४ आणि २१ अंश सेल्सिअस नोंदवले गेले, जे सरासरीपेक्षा अधिक आहे. सांताक्रूझ येथे कमाल तापमान ३८.४ अंश सेल्सिअस तर कुलाबा येथे ३५.९ अंश सेल्सिअस नोंदवले गेले. शहरातील काही भागांत तापमान अधिक वाढले असून राम मंदिर परिसरात ४२ अंश सेल्सिअस आणि विक्रोळी येथे ४१.७ अंश सेल्सिअस तापमानाची नोंद झाली आहे.

उष्णतेची लाट कधी जाहीर केली जाते?

सामान्यतः सलग दोन दिवस कमाल तापमान ३७ अंश सेल्सिअसपेक्षा जास्त राहिल्यास हवामान विभागाकडून उष्णतेच्या लाटेचा इशारा दिला जातो. यंदा मार्चच्या सुरुवातीलाच असामान्य तापमानाची नोंद होत असल्याने तज्ज्ञांनी चिंता व्यक्त केली आहे.

सामान्यतः मुंबईमध्ये १० मार्चच्या सुमारास तापमान ३५ ते ३६ अंश सेल्सिअसच्या आसपास असते. मात्र यंदा गेल्या दशकातील विक्रम मोडत मार्चच्या पहिल्याच आठवड्यात तापमानात मोठी वाढ झाली आहे. हवामान तज्ज्ञांच्या मते, पूर्वेकडून येणारे कोरडे वारे आणि समुद्री वाऱ्यांची कमकुवत स्थिती यामुळे उष्णतेचा प्रभाव अधिक वाढला आहे.

दरम्यान, मंगळवार आणि बुधवारीही उष्णतेची परिस्थिती कायम राहण्याची शक्यता असून मुंबई, ठाणे, रायगड आणि पालघर जिल्ह्यांसाठी पिवळा इशारा देण्यात आला आहे. त्यामुळे नागरिकांनी उष्णतेपासून बचावासाठी आवश्यक काळजी घेण्याचे आवाहन करण्यात आले आहे.