Sanjeev Tawde : राज्यातील विविध शासकीय विभागांतील भ्रष्टाचाराच्या घटना उघड होत असतानाच मुंबईत पुन्हा एकदा लाचलुचपत प्रतिबंधक विभागाने (ACB) मोठी कारवाई केली आहे. मालाडमधील कुरार पोलीस ठाण्यातील वरिष्ठ पोलीस निरीक्षक संजीव तावडे आणि पोलीस उपनिरीक्षक ज्ञानेश्वर जुन्ने यांना लाच घेताना रंगेहात अटक करण्यात आली आहे. तक्रारदार असलेल्या एका वकिलाविरोधातील फसवणूक आणि लैंगिक शोषणाच्या तक्रारीवर गुन्हा दाखल न करण्यासाठी संबंधित अधिकाऱ्यांनी तब्बल तीन लाख रुपयांची मागणी केल्याचा आरोप आहे. त्यापैकी दोन लाख रुपये यापूर्वी स्वीकारण्यात आले होते, तर उर्वरित एक लाख रुपयांची रक्कम स्वीकारताना एसीबीच्या पथकाने बुधवारी सापळा रचून दोघांना अटक केली. कारवाईनंतर आरोपींच्या केबिनमध्ये झाडाझडती घेण्यात आली असता 6 लाख 34 हजार रुपयांची रोकड आढळून आली. या रोख रकमेबाबतही तपास सुरू असून ती कशासाठी ठेवण्यात आली होती, याचा शोध घेतला जात आहे. या प्रकरणात एसीबीने सखोल चौकशीसाठी पाच दिवसांच्या पोलीस कोठडीची मागणी केली होती. न्यायालयाने ती मान्य करत दोन्ही आरोपींना 23 फेब्रुवारीपर्यंत पोलीस कोठडी सुनावली आहे. दरम्यान, राज्यातील शासकीय कार्यालयांमध्ये वाढत्या लाचखोरीच्या घटनांमुळे सर्वसामान्यांमध्ये नाराजी व्यक्त होत आहे. या प्रकरणात पुढील तपास सुरू असून आणखी धक्कादायक माहिती समोर येण्याची शक्यता वर्तवली जात आहे.
