Mukesh Khanna : “आमची संस्कृती आणि ग्रंथांचा अपमान आहे, यांना लाज वाटली पाहिजे,” ‘रामायण’वर मुकेश खन्ना यांचा आक्षेप
Mukesh Khanna : साई पल्लवीच्या सीनच्या वादावर दिग्दर्शक नितेश तिवारी यापूर्वीच स्पष्टीकरण दिलं
Mukesh Khanna : नितेश तिवारी दिग्दर्शित बहुप्रतिक्षित ‘रामायण’ चित्रपट प्रदर्शित झाला आहे. मात्र ज्येष्ठ अभिनेते मुकेश खन्ना यांनी चित्रपटाच्या निर्मात्यांवर जोरदार टीका केली आहे. या चित्रपटातील एका सीनमध्ये सीता माता हातात तलवार घेऊन लढताना दाखवली आहे. साई पल्लवीनं साकारलेल्या सीतामातेच्या ‘फायटर’ अवतारावर तसंच पात्रांमध्ये केलेल्या कथित बदलांवर मुकेश खन्ना यांनी आक्षेप घेतला आहे.
मुकेश खन्ना यांनी एका मुलाखतीदरम्यान म्हटलं की, “निर्माते केवळ पैसे कमावण्यासाठी आपल्या धार्मिक ग्रंथांशी आणि संस्कृतीशी छेडछाड करत आहेत. तुम्ही आधीच ‘आदिपुरुष’चा अवस्था पाहिली आहे. तरीही निर्माते यातून काही शिकायला तयार नाहीत. सीतामातेला फायटरच्या रूपात दाखवणं ही आमची संस्कृती आणि ग्रंथांचा अपमान आहे, यांना लाज वाटली पाहिजे,” असा घणाघाती आरोप त्यांनी केला.
इतर धर्मांच्या धार्मिक श्रद्धांबाबतही असे प्रयोग करण्याचं धाडस दाखवतील का?
मुकेश खन्ना यांनी दिग्दर्शक ओम राऊत आणि चित्रपटाच्या लेखकांवर टीका करत धार्मिक कथांवर आधारित चित्रपट बनवताना सर्जनशीलतेच्या नावाखाली मूळ आशयाशी छेडछाड करू नये. एखाद्या निर्मात्याला स्वतःच्या सर्जनशीलतेनुसार कथा मांडण्याचं स्वातंत्र्य असेल, तर इतर धर्मांच्या धार्मिक श्रद्धांबाबतही असे प्रयोग करण्याचं धाडस ते दाखवतील का? असा सवालही त्यांनी केला.
याशिवाय मुकेश खन्ना यांनी रणबीर कपूरच्या कास्टिंगवरही प्रश्न उपस्थित केले. ‘ॲनिमल’ चित्रपटानंतर मुलांमध्ये रणबीरची प्रतिमा योग्य राहिलेली नाही, त्यामुळं त्याला भगवान रामाच्या भूमिकेत स्वीकारणं प्रेक्षकांसाठी सोपं नाही, असं मत त्यांनी मांडलं.
दरम्यान, साई पल्लवीच्या सीनच्या वादावर दिग्दर्शक नितेश तिवारी यापूर्वीच स्पष्टीकरण दिलं आहे. सीतेच्या पात्राला एक नवा अवतार देण्यासाठी आम्ही ‘अद्भुत रामायण’ या ग्रंथातून प्रेरणा घेतली आहे, असं त्यांनी म्हटलं आहे.
सध्या या चित्रपटाबाबत संमिश्र प्रतिक्रिया येत आहे. काही जण या चित्रपटात असलेल्या सर्व पात्रांचे कौतुक केले जात आहे. विशेष म्हणजे रावणाची व्यक्तिरेखा साकारलेल्या अभिनेता यशवर कौतुकाचा वर्षाव होत आहे. या चित्रपटातील जटायू आणि रावण यांच्यातील युद्धांच्या सीनला प्रेक्षकांची विशेष पसंती मिळत असल्याचेही म्हंटले जात आहे.
