Muhurat Trading : दिवाळीनिमित्त रविवारी झालेल्या विशेष मुहूर्त ट्रेडिंग (Muhurat Trading) सत्रात सेन्सेक्स आणि निफ्टी हे प्रमुख निर्देशांक किरकोळ घसरणीसह बंद झाले. सलग सात दिवस सुरू असलेल्या तेजीनंतर गुंतवणूकदारांनी नफावसुली केल्यामुळे दिवाळीच्या काळात गेल्या आठ वर्षांपासून सुरू असलेली तेजीची मालिका यंदा खंडित झाली.

दरवर्षी नव्या संवत वर्षाच्या स्वागतासाठी आयोजित या विशेष सत्राची सुरुवात उत्साही वातावरणात झाली. परंतु ३० शेअर्सचा (Muhurat Trading) समावेश असलेला बीएसई सेन्सेक्स ही तेजी टिकवून ठेवू शकला नाही. सत्राच्या अखेरीस सेन्सेक्स २८.६२ अंकांनी (०.०४ टक्के) घसरून ८०,९९९.४० अंकांवर बंद झाला. सेन्सेक्समधील ३० कंपन्यांपैकी १६ कंपन्यांचे शेअर्स वधारले, तर १४ कंपन्यांचे शेअर्स घसरले.

दिवाळीच्या या विशेष सत्रादरम्यान सेन्सेक्सने ८१,४४२.११ अंकांची उच्चांकी पातळी गाठली होती. म्हणजेच तो ४१४.०९ अंकांनी (०.५१ टक्के) वधारला होता. ५० शेअर्सचा समावेश असलेला एनएसई निफ्टी सकारात्मक सुरुवात केल्यानंतर ४३.९५ अंकांनी (०.१८ टक्के) घसरून २४,९८६.४० अंकांवर बंद झाला.

दरम्‍यान, सेन्सेक्स आणि निफ्टी या दोन्ही बेंचमार्क निर्देशांकांनी २०१८ पासून दिवाळीच्या ट्रेडिंग सत्रांमध्ये (Muhurat Trading) सुरू असलेली त्यांची सलग आठ वर्षांची तेजीची मालिका खंडित केली. याआधीच्या सलग सात सत्रांमधील तेजीमुळे फेब्रुवारी २०२१ नंतरची सर्वात मोठी साप्ताहिक वाढ दिसून आली होती.