ढाका : बांगलादेशात जमावाने गेल्या आठवड्याच्या अखेरीस अल्पसंख्य हिंदूंच्या डझनभर घरांवर हल्ला करून घरांचे मोठे नुकसान केले आहे. बांगलादेशातील अधिकारी आणि प्रसिद्धी माध्यमांनी या हल्ल्यांची माहिती दिली आहे. या हल्ल्यांची दखल घेऊन बांगलादेशचे मुख्य सल्लागार डॉ. मुहम्मद युनूस यांनी मंगळवारी या घरांच्या दुरुस्तीचे आदेश दिले आहेत.

रंगपूर उपजिल्ह्यातील गंगाचारा येथील १७ वर्षाच्या हिंदू युवकाने सोशल मीडियावर केलेल्या कथित आक्षेपार्ह टिप्पणीनंतर शनिवारी संध्याकाळी हिंसाचाराला सुरुवात झाली होती, असे स्थानिक बंगाली भाषिक दैनिकाने म्हटले आहे. पोलिसांनी या किशोरवयीन युकाला अटक केली असून तो एका खासगी पॉलिटेक्निक संस्थेतील विद्यार्थी आहे, असेही या वृत्तामध्ये म्हटले आहे.

या युवकावर असलेल्या आरोपांमध्ये तथ्य असल्याचे निदर्शनास आल्यावर त्याला ताब्यात घेण्यात आले असून न्यायालयाच्या आदेशांनुसार त्याची रवानगी बालगुन्हेगारांच्या पुनर्वसन केंद्रामध्ये करण्यात आली असल्याचे गंगाचारा येथील ठाणे अंमलदार अल इम्रान यांनी सांगितले. मात्र संतप्त जमावाने शनिवारी रात्री आणि रविवारी दुपारी हिंदूंच्या काही घरांवर हल्ले केले. लष्कराने परिस्थिती नियंत्रणात आणली.

या हल्ल्यामध्ये हिंदूंच्या १२ घरांचे नुकसान झाले. अटक केलेला युवक आणि त्याच्या काकांचे कुटुंब शेजारच्या गावातल्या नातेवाईकांच्या घरी रहात आहेत. हल्ला झालेल्या २२ पैकी १९ हिंदू कुटुंबातील महिला सुरक्षेसाठी नातेवाईकांच्या घरी रहात आहेत. हे हल्ले करणाऱ्यांची ओळख पटवण्याचे काम स्थानिक अधिकारी करत असून त्यांच्यावर कायदेशीर कारवाई केली जाणार आहे, असे रंगपूरचे उपायुक्त मोहम्मद रबिउल फैजल यांनी सांगितले.

स्थानिक सामाजिक नेते परिसरात पुन्हा सुसंवाद निर्माण करण्यासाठी प्रशासन आणि पोलिसांसोबत काम करत आहेत. नुकसान झालेल्या घरांची दुरुस्ती करण्याचे काम जिल्हा आणि उप जिल्हा प्रशासनाच्या देखरेखीखाली मंगळवारपासून सुरू करण्यात येणार असल्याचे डॉ. युनूस यांच्या कार्यालयाने प्रसिद्धीस दिलेल्या निवेदनात म्हटले आहे.