Mrunal Thakur Interview: अभिनेत्री मृणाल ठाकूर सध्या तिच्या ‘दो दिवाने शहर में’ या चित्रपटामुळे चर्चेत आहे. मात्र अलीकडेच तिने तिच्या वैयक्तिक आयुष्यातील एक भावनिक अनुभव शेअर केला. बॉडी शेमिंगमुळे ती कशी खचली होती आणि अभिनेता अक्षय कुमार यांच्या एका सल्ल्याने तिला कसा आत्मविश्वास मिळाला, याबद्दल तिने खुलासा केला.

एका मुलाखतीत मृणालने सांगितले की, तिच्या आयुष्यात असे दिवस होते जेव्हा ती बॉडी शेमिंगमुळे खूप दुःखी व्हायची. लोकांच्या टीका आणि सोशल मीडियावरील ट्रोलिंगमुळे ती अनेकदा रडत झोपायची. सकाळी डोळे सुजलेले असतानाच उठून स्वतःलाच प्रश्न विचारायची की, हे सगळे का चालले आहे? त्या काळात तिचा आत्मविश्वास कमी झाला होता.

मात्र एका तरुण चाहत्याने तिचा दृष्टिकोन बदलला. मृणालने सांगितले की, एका फॅनने तिची भेट घेतली आणि तिच्या सौंदर्याची व व्यक्तिमत्त्वाची मनापासून स्तुती केली. तिच्या शरीरयष्टीचे कौतुक केले. त्या क्षणी मृणालला जाणवले की, ती जशी आहे तशीच चांगली आहे. इतरांसारखी दिसण्याचा प्रयत्न करण्यापेक्षा स्वतःला स्वीकारणे अधिक महत्त्वाचे आहे. त्या चाहत्याच्या शब्दांनी तिच्या मनात सकारात्मक बदल घडवला.

याच काळात तिला अभिनेता अक्षय कुमार यांच्याकडूनही महत्त्वाची शिकवण मिळाली. मृणालने सांगितले की, ती अक्षय कुमार यांना भेटली असता त्यांनी तिला खूप सुंदर सल्ला दिला. त्यांनी सांगितले की, “तू स्वतःला जसे आहेस तसे स्वीकारलेस, ही खूप चांगली गोष्ट आहे. इतर काय म्हणतात याकडे लक्ष न देता तू जे योग्य वाटते ते करतेस, हे कौतुकास्पद आहे.” मात्र त्यांनी एक महत्त्वाची गोष्टही सांगितली की, “एखाद्या भूमिकेसाठी जर शरीरयष्टीत बदल करणे गरजेचे असेल, तर ते व्यावसायिक दृष्टिकोनातून करायला हरकत नाही.”

अक्षय कुमार यांच्या या शब्दांचा मृणालवर खोल परिणाम झाला. तिने स्वतःकडे सकारात्मक दृष्टीने पाहायला सुरुवात केली. बॉडी शेमिंग किंवा ट्रोलिंगकडे दुर्लक्ष करून स्वतःवर प्रेम करणे तिने शिकले.

कामाच्या आघाडीवर मृणाल सध्या ‘दो दिवाने शहर में’ या चित्रपटात झळकत आहे. या चित्रपटात तिच्यासोबत अभिनेता सिद्धांत चतुर्वेदी प्रमुख भूमिकेत आहे. चित्रपटाला प्रेक्षक आणि समीक्षकांकडून संमिश्र प्रतिसाद मिळाला आहे. बॉक्स ऑफिसवर मात्र चित्रपटाने पहिल्या चार दिवसांत सुमारे ४.८५ कोटी रुपयांची कमाई केली आहे. आगामी काळात मृणाल अभिनेता आदिवी शेषसोबत ‘डकैत’ या चित्रपटात दिसणार आहे.

मृणाल ठाकूरचा हा अनुभव अनेक तरुणांसाठी प्रेरणादायी आहे. स्वतःला स्वीकारणे, आत्मविश्वास टिकवणे आणि टीकेकडे सकारात्मक दृष्टीने पाहणे किती महत्त्वाचे आहे, हे तिच्या कथेतून स्पष्ट होते.