हडपसर, दि. 17 (विवेकानंद काटमोरे) – लावणी ही चोरून बघण्याची आणि डोळे फाडून बघण्याचीही कला नाही. तो एक विकार आहे. हा विकार घेऊन ही कला पाहिली तर ती टिकणार नाही. लावणी ही एकच अशी कला आहे ज्यामध्ये सगळं झाकलं जातं, लपतं आणि मातलंही काहीच जात नाही. तीला राजाश्रयाबरोबरच लोकाश्रयही मिळाला पाहिजे. ही जबाबदारी रसिक प्रेक्षकांची आहे, असे मत खासदार श्रीनिवास पाटील यांनी व्यक्‍त केले.

लोककला क्षेत्रासाठी योगदान देत असलेल्या ज्येष्ठ लोकनाट्य कलावंत अमन तांबे पुणेकर यांना राज्यस्तरीय “शाहीर पठ्ठे बापूराव,’ लावणी नृत्यांगणा रूपा बारामतीकर यांना “लोकसाहित्यिक डॉ. भास्करराव खांडगे’ तर, प्रसिद्ध ढोलकीपटू गोविंद कुडाळकर यांना “बापूसाहेब जिंतीकर पुरस्कार’ देऊन पठ्ठे बापूराव प्रतिष्ठान व सांस्कृतिक कला मंडळाच्यावतीने
गौरविण्यात आले. त्यावेळी खासदार पाटील बोलत होते.

वानवडी येथील महात्मा फुले सांस्कृतिक भवनात झालेल्या कार्यक्रमास ज्येष्ठ अभिनेत्री लीला गांधी, राष्ट्रवादी कॉंग्रेसचे शहर अध्यक्ष प्रशांत जगताप, माजी नगरसेवक मारुती तुपे, बंडू गायकवाड, योगेश ससाणे, साधना बॅंकेचे संचालक सुरेश घुले, महादेव कांचन, अविनाश तुपे, स्मिता गायकवाड, दिपाली कवडे, दिलीप गायकवाड, विकास गायकवाड, अशोक आव्हाळे आदी उपस्थित होते.

यावेळी लावणी महोत्सवात रेश्‍मा वर्षा परितेकर पार्टी, शाहीर सगनभाऊ ग्रुप-जेजुरी, आर्यभूषण थिएटर ग्रुप-पुणे, कविता बंड निर्मित ढोलकीचा खनखनाट, पुष्पराज कलाकेंद्रच्या कलावंतांनी कला सादर केली. प्रतिष्ठानचे संस्थापक जयप्रकाश वाघमारे, कार्याध्यक्ष सत्यजित खांडगे, अध्यक्ष देविदास पाटील, मित्रावरुण झांबरे, डॉ. शंतनू जगदाळे, रेश्‍मा परितेकर, रामदास खोमणे, संदीप घुले, बापू जगताप, आकाश वाकचौरे यांनी संयोजन केले. दीपक वाघमारे यांनी सूत्रसंचालन केले.