पुणेः रेल्वेने सुरू केलेल्या वंदे भारत एक्सप्रेस गाडीला प्रवाशांचा चांगला प्रतिसाद मिळत आहे. मात्र, या एक्सप्रेस गाडीचा तिकीट दर सर्वसामान्यांच्या खर्च्याच्या बाहेर असल्याने त्यांना परवडेल अशी अमृत भारत एक्सप्रेस ही रेल्वे गाडी सुरू करण्याच्या हालचालींना वेग आला आहे. त्यानुसार या रेल्वे गाडीतून सर्वसामान्या माफक दरांत प्रवास करता येणार आहे. पुण्यातून ही रेल्वे गाडी उत्तर भारतातील चार ठिकाणे जोडणाऱ्या रेल्वे मार्गांवर सुरू करण्याचा प्रयत्न रेल्वे विभागाकडून करण्यात येत आहे. यामुळे ही रेल्वे गाडी सुरू झाल्यास प्रवाशांना कमी खर्चात प्रवास करणे सहज शक्य होणार आहे.

मिळालेल्या माहितीनुसार, पुणे रेल्वे विभागाकडून अमृत भारत योजनेअंतर्गत २० स्थानकांच्या पुर्निविकासाची कामे सुरू करण्यात आली आहेत. वंदे भारत एक्सप्रेस गाडी जशी आहे त्याच धर्तीवर अमृत भारत एक्सप्रेस गाडीचे नवीन डबे तयार करण्याचे काम देखील सुरू झाले आहे. या योजनेअंतर्गत पुणे स्थानकाबरोबरोरच हडपसर रेल्वे स्टेशनचा देखील विस्तार करण्यात येणार आहे. पुणे रेल्वे स्टेशनवरून दानापूर आणि छप्रा या दोन गाड्या, तर हडपसर रेल्वे स्टेशनवरून मुझफ्फरपूर आणि पुरी अशा दोन गाड्यांचा मार्ग निश्चित करण्याच्या हालचाली रेल्वे विभागाकडून सुरू असल्याची माहिती मिळत आहे.

अहमदाबाद ते गांधीनगर अमृत एक्सप्रेसला चांगला प्रतिसाद 

रेल्वे मंत्रालयाने जुलै २०२३ मध्ये वंदे भारत एक्स्प्रेससारखीच दिसणारी, पण वातानुकूलित नसलेली आणि कमी तिकीट दर असलेली अहमदाबाद ते गांधीनगर ही अमृत भारत एक्स्प्रेस सुरू केली. कमी खर्चात आणि कमी वेळेत प्रवास करण्याची सुविधा असल्यामुळे या गाड्याला प्रवाशांचा चांगला प्रतिसाद मिळत आहे.