Moushumi Chatterjee | चित्रपटसृष्टीत असे अनेक कलाकार आहेत, ज्यांनी लोकप्रिय सिनेमांमध्ये काम करत स्वतःची वेगळी ओळख निर्माण केली आहे. मात्र, काहीजण वयामुळे, तर काहीजण चित्रपटांना हवे तसे यश न मिळाल्यामुळेही मोठ्या पडद्यापासून दूर गेले. परंतु, मागील काही वर्षात शर्मिला टागोर, सेलिना जेटली, फरदीन खान सारख्या कलाकारांनी पुन्हा या क्षेत्रात पुनरागमन केले आहे. आता या यादीमध्ये मौसमी चॅटर्जींचे नाव देखील जोडले जाणार आहे. अभिनेत्री मौसमी चॅटर्जी तब्बल 12 वर्षांनी मोठ्या पडद्यावर कमबॅक करणार आहे. मौसमी यांनी शेवटचे 2013 साली आलेल्या ‘गोयनाप बक्शो’ या सिनेमात काम केले होते. त्यांना हिंदीसह बंगाली चित्रपटातील त्यांच्या अभिनयासाठी ओळखले जाते. आता मोठ्या पडद्यावर त्यांचे पुन्हा कमबॅक होणार असल्याने चाहते देखील त्यांना नवीन भूमिकेत पाहण्यासाठी उत्सुक आहेत. मौसमी चॅटर्जी या लवकरच ‘आरी’ या चित्रपटात दिसणार आहे. या चित्रपटात टीएमसीच्या माजी खासदार व अभिनेत्री नुसरत जहाँ या देखील आहेत. याशिवाय, नुसरत यांचे पती यश दासगुप्तांची देखील चित्रपटात प्रमुख भूमिका असणार आहे. 76वर्षीय मौसमी यांनी आतापर्यंत 100 पेक्षा अधिक चित्रपटांमध्ये काम केले आहे. 70-80 च्या दशकात त्यांनी केलेले चित्रपट विशेष गाजले. त्यांनी अमिताभ बच्चन यांच्यासोबतही चित्रपटात प्रमुख भूमिका साकारली आहे. त्यांनी 1967 साली आलेला बंगाली चित्रपट ‘बालिका बधू’च्या माध्यमातून करिअरला सुरुवात केली होती. याशिवाय, मौसमी यांनी ‘रोटी कपड़ा और मकान’, ‘बेनाम’ आणि ‘मंजिल’ या लोकप्रिय चित्रपटांमध्येही काम केले आहे. दरम्यान, नुसरत जहाँ आणि मौसमी चॅटर्जी यांची प्रमुख भूमिका असलेला ‘आरी’ हा चित्रपट 25 एप्रिलला मोठ्या पडद्यावर रिलीज होणार आहे. या चित्रपटाचे शूटिंग पूर्ण झाले आहे.
