प्रभात वृत्तसेवा राहू – दौंड तालुक्यातील राहूनजीक देवकर वाडी (गणेश नगर) येथे रविवारी सकाळी अत्यंत हृदयद्रावक घटना घडली. ओढ्यात बुडून एका आई आणि तिच्या 11 वर्षांच्या मुलाचा दुर्दैवी मृत्यू झाला.या घटनेत मृत्यू झालेल्यांची नावे निर्मला अनिल दरेकर (वय 32) आणि हर्षल अनिल दरेकर (वय 11) अशी आहेत. घटनेची माहिती पती अनिल दरेकर (वय 34) यांनी यवत पोलिस स्टेशनमध्ये दिली. सविस्तर माहिती अशी की, दरेकर कुटुंब पारंपरिक शेती व्यवसाय करत असून, रविवारी निर्मला दरेकर या गणेश नगर येथील त्यांच्या शेतात खुरपणीसाठी गेल्या होत्या. त्यांचा मुलगा हर्षल रविवारी शाळेला सुट्टी असल्यामुळे आईसोबत शेतात गेला होता. अनिल दरेकर सायकल दुरुस्तीसाठी खामगाव येथे गेले होते.शेतालगत असलेल्या ओढ्यात हर्षल खेळता खेळता अचानक पडला, त्याला वाचवण्यासाठी आई निर्मला तातडीने धावल्या, मात्र दोघांनाही पोहता न येत असल्याने ते पाण्यात बुडाले.स्थानिक ग्रामस्थांच्या मदतीने तातडीने त्यांना यवत ग्रामीण रुग्णालयात दाखल करण्यात आले, परंतु उपचारापूर्वीच त्यांचा मृत्यू झाल्याचे डॉक्टरांनी घोषित केले. या घटनेमुळे संपूर्ण देवकर वाडी आणि परिसरात शोककळा पसरली आहे.पुढील तपास यवत पोलीस स्टेशनचे कर्मचारी करीत आहेत. एकाच क्षणी दोन जीव हरपल्याने कुटुंबावर दुःखाचा डोंगर कोसळला आहे. संपूर्ण गाव हळहळ व्यक्त करीत आहे.
