मराठवाडा जनविकास संघाने उचलला माकडांच्या खाद्याचा भार

सांगवी – करोनाचा प्रादुर्भाव रोखण्यासाठी सरकारने घोषित केलेल्या लॉकडाऊनमुळे सर्वसामान्य माणसांप्रमाणे मुक्‍या प्राण्यांनाही झळ पोहचत आहे. उस्मानाबाद जिल्ह्यातील (परांडा) सोनारी येथे माकडांचे मोठ्या प्रमाणावर वास्तव्य आहे. येथील कालभैरवनाथ मंदिर सुरक्षिततेमुळे भाविकांसाठी बंद असल्याने माकडांना खायला मिळणे मुश्‍कील झाले आहे. त्यामुळे या वन्यप्राण्यांना पिंपळे गुरव येथील मराठवाडा जनविकास संघ व सोनारी ग्रामस्थांच्या वतीने खाद्य पुरविण्यात येत आहे.

या सुविधेचा शुभारंभ मराठवाडा जनविकास संघाचे अध्यक्ष अरुण पवार, भैरवनाथ अन्नछत्र ट्रस्टचे अध्यक्ष महेश कारकर, कोषाध्यक्ष रवींद्र खुळे, सहसचिव अशोक माने, सदस्य भीमा घाडगे, डोनजे गावचे सरपंच गजेंद्र सूर्यवंशी, संतोष भोरे, बापू शिंदे, विलास शिंदे, दिनेश घोगरे, सचिन भोरे, विनायक गंगाविठ्ठल, अक्षय भोरे, अशोक भोरे, चंद्रकांत भोरे, हनुमंत गोरे यांच्या उपस्थितीत करण्यात आला.

येथील माकडांसाठी काकडी, डाळिंब, केळी, गाजर, टोमॅटो, मक्‍याची कणसे, पपई आदी पुरविण्यात आली आहे. त्यामुळे 450 ते 500 माकडांची उपासमार टळण्यास मदत होणार आहे. गेल्या काही वर्षांपासून तुळजापूर, उस्मानाबाद तालुक्‍यातील जनावरांना व वन्य प्राण्यांना पाण्याअभावी जिवास मुकावे लागू नये, म्हणून सिमेंटच्या 500 लिटर क्षमतेच्या 107 टाक्‍या ठेवून पशुधन वाचवा मोहीम हाती घेतलेली आहे. त्यामुळे माकडे, हरीण, भटकी जनावरे, मोर, इतर पक्ष्यांची पाण्यावाचूनची ससेहोलपट थांबण्यास मदत झाली आहे. यासोबतच संघाच्या वतीने पिंपरी चिंचवड शहर परिसरात 370 गरजूंना गहू, तांदूळ, बेसन, तूरडाळ, पोहे, तेल, साखर, चहा पावडर, मिरची पावडर असे धान्य 10 दिवस पुरेल याप्रमाणे किट वाटप करण्यात आले. करोनापासून बचावासाठी मास्क, सॅनिटायझर किटचे वाटप करण्यात आले. तसेच पोलिसांना मास्कची गरज लक्षात घेऊन महाएनजीओ (सातारा) येथे फेडरेशनच्या साहाय्याने शंभर मास्क हभप अक्षय महाराज भोसले यांच्या वतीने शंभर मास्क पोलिसांसाठी देण्यात आले.

लॉकडाऊनमुळे माणसांप्रमाणे मुक्‍या प्राण्यांना त्रास सहन करावा लागत आहे. माणसांना बोलता येते, तसेच त्यांना विविध ठिकाणांहून मदत दिली जात आहे. माकडांसारख्या वन्यप्राण्यांना खाद्याअभावी प्राणाला मुकावे लागू नये, यासाठी सोनारी येथील माकडांना खाद्याची व्यवस्था करण्यात आली आहे, अशी माहिती मराठवाडा जनविकास संघाचे अध्यक्ष अरुण पवार यांनी दिली.