Mona Juul : एपस्टीन फाईल्समध्ये नाव आल्यामुळे नॉर्वेच्या माजी राजदूत महिलेने राजीनामा दिला आहे. मोना जुल (Mona Juul) यांनी १९९० च्या दशकात इस्रायल-पॅलेस्टिनमध्ये शांतता प्रस्थापनेसाठी प्रयत्न केले होते. तसेच अलिकडेच त्या जॉर्डनमध्ये नॉर्वेच्या राजदूत देखील राहिल्या होत्या. मात्र जेफ्री एपस्टीनशी संबंधित फाईल्समध्ये त्यांचे नाव आल्यामुळे त्यांना जॉर्डनमधील राजदूत पदावरून हटवण्यात आले होते आणि त्यांच्या भूमिकेची छाननी सुरू करण्यात आली होती, असे नॉर्वेच्या परराष्ट्र मंत्रालयाने म्हटले आहे. जेफ्री एपस्टीनने २०१९ मध्ये न्यूयॉर्कमधील तुरुंगात आत्महत्या केली. त्याच्या काही दिवस आगोदरच एपस्टीनने केलेल्या मृत्यूपत्रात मोना जुल यांचचे पती तेर्जे रॉड-लार्सेन आणि जुल यांच्या मुलांच्या नावे १० दशलक्ष डॉलर ठेवल्याचे उघड झाले होते. यामुळे मोना जुल यांच्यावर मोठी टीका व्हायला लागली होती. जुल यांनी राजीनामा दिला हे योग्यच केले, असे नॉर्वेचे परराष्ट्र मंत्री एस्पेन बार्थ ईद यांनी म्हटले आहे. लैंगिक गुन्ह्यात दोषी गुन्हेगाराशी जुल यांचे संबंध हे न्याय्य व्यवस्थेतील गंभीर त्रुटी दर्शवतात. जुल यांचे आणि एपस्टीन यांचे काय संबंध होते, याबाबतचा तपास पुढे सुरूच राहणार आहे. तसेच जुल यांचे पती रॉड-लार्सेन प्रमुख असलेल्या न्यूयॉर्कमधील इंटरनॅशनल पीस इन्स्टिट्युटचे निधी संकलन आणि अन्य संबंधांचाही आढावा घेतला जाणार असल्याचेही परराष्ट्र मंत्रालयाने म्हटले आहे. आपण आणि एपस्टीनमधीलसंबंध काहीसे संदिग्ध असल्याचे जुल यांनी काही दिवसांपुर्वी म्हटले होते. हे संबंध अगदी किरकोळ होते. पण आपल्या पतीचे एपस्टीनशी संबंध नंतर वाढत गेल्याचे त्यांनी मान्य केले होते. इस्रायल आणि पॅलेस्टीनमधील संघर्ष संपवण्यासाठी १९९० मध्ये केल्या गेलेल्या ओस्लो करारासाठी जुल आणि रॉड-लार्सेन यांनी विशेष प्रयत्न केले होते.
