Muralidhar Mohol | Chandrakant Patil | पुण्यात केंद्रीय राज्यमंत्री मुरलीधर मोहोळ यांच्या खासदार जनसंपर्क कार्यालयाचा शुभारंभाचा कार्यक्रम बालगंधर्व रंगमंदिर येथे पार पडला. या कार्यक्रमाला मुख्यमंत्री देवेंद्र फडणवीस यांची विशेष उपस्थिती लाभली होती. यावेळी भारतीय जनता पक्षाचे प्रदेशाध्यक्ष रवींद्र चव्हाण, उच्च व तंत्रशिक्षण मंत्री चंद्रकांत पाटील हे देखील उपस्थित होते. या कार्यक्रमात चंद्रकांत पाटील यांनी केलेल्या विधानाची जोरदार चर्चा होत आहे. तसेच त्यांनी केलेल्या विधानावर आपल्या खास शैलील मोहोळ यांनी दिलेलं उत्तर लक्ष वेधून घेणारे ठरले आहे.

पुण्याचे खासदार मुरलीधर मोहोळ यांना अनेपक्षितरित्या केंद्रात राज्यमंत्रिपद मिळालं. मोहोळ यांना थेट केंद्रात राज्यमंत्रिपद मिळेल याचा अंदाज कोणालाच नव्हता, असे विधान पाटील यांनी केले. तसेच मलाही केंद्रीय गृहमंत्री अमित शाह यांना भेटण्यासाठी मुरलीधर मोहोळ यांच्याशी बोलावं लागतं, असा मिश्किल टोलाही पाटील यांनी लगावला. त्यांनी केलेल्या विधानाला मोहोळ यांनी आपल्या खास शैलीत उत्तर दिले.

नेमंक काय म्हणाले चंद्रकांत पाटील?

केंद्रामध्ये मुरलीधर मोहोळ यांना मंत्रिपद मिळणं हे अनपेक्षित होतं, कारण खासदार झाल्यानंतर मध्ये पाच-दहा वर्ष जावी लागतात. त्यानंतर मंत्रिपद मिळत असतं. मात्र, मोहोळ हे भाग्य घेऊनच जन्माला आले आहेत. नगरसेवक, स्थायी समिती सदस्य, नंतर अध्यक्ष, महापौर त्यानंतर त्यांनी डायरेक्ट उडी मारली आणि ते खासदार झाले. मी गुजरातमध्ये दहा वर्ष काम केले असल्याने अमित शहा यांना भेटण्यासाठी आधी लोक माझ्याकडे पाहायचे. पण आता मलाही अमितभाईंसाठी अण्णाला भेटावे लागते, असे चंद्रकांत पाटील म्हणाले.

मोहोळांनी दिलं खास शैलीत उत्तर 

३० ते ३२ वर्ष संघटनेत काम करणारा कार्यकर्ता ज्यावेळी या देशाचा खासदार आणि केंद्रीय मंत्री होतो, हे श्रेय माझ्या नागरिकांचे आहे, माझ्या पक्षाचे आणि माझ्या नेत्वृवाचे आहे. दादा म्हणाले कसा मंत्री झाला हे आम्हाला कळलं नाही दादा मी तुम्हाला सांगतो मलाच अजून मी कसा मंत्री झालो हे कळलं नाही. महाराष्ट्रात अचानक काय घडतं कोण काय करतं हे सगळ्यांना माहिती आहे ते इथं बसलेत. त्यामुळे हे त्यांना एकट्याच माहित होतं बाकी कुणाला काही माहिती नव्हतं, असं उत्तर मोहोळांनी दिलं. यावेळी एकच हशा पिकला होता.

हेही वाचा :  शेख हसीना यांना आणखी एक धक्का ; मुलीची WHO मधून हकालपट्टी ; नेमकं कारण काय ? जाणून घ्या